古巨基香港文匯報訊 內地音樂節目真人騷《蒙面唱將猜猜猜》第三季前晚正式播出，古巨基擔任猜評團新成員亮相現場。今集蒙面唱將「送你一隻千紙鶴」同合唱團合唱的一首《明天會更好》，「千紙鶴」一開口就令猜評團熱烈討論，他們都估「千紙鶴」係周慧敏，不過基仔就不停誤導大家，仲在急口令環節親自演繹粵語版「紅鯉魚與綠鯉魚與驢」打圓場。
除了唱歌，「千紙鶴」仲現場大晒佢模仿簽名技能，睇到在場人士嘩嘩聲！其中一位猜評團成員候佩岑睇到「千紙鶴」的背影，就估佢係周慧敏，仲走去問基仔意見，基仔就故弄玄虛咁話：「我只能說像她，但我覺得不是她。」最後，猜評團成員根據手上線索，最終鎖定「送你一隻千紙鶴」就係周慧敏。當基仔親自走去揭開「千紙鶴」面紗時，先笑住話其實一早已經知道係周慧敏，仲話自己左右為難，在台下忍得好辛苦。