「新民主同盟」個咖喱飯（范國威）喺網上就對網民講內地「很危險」，但自己落到地親自行出去時，就一直都咁笑口噬噬，不亦樂乎。民建聯噚日下晝一點幾就喺facebook上貼咗張圖（見左圖、民建聯fb圖片），除咗有民主黨一嚿雲（黃碧雲）同「港珠澳大橋香港連接路」個路牌開心合照，仲有咖喱飯本人興奮一踎，民建聯都好安慰表示︰「反對派議員參觀港珠澳大橋表現得好興奮，黃碧雲同范國威仲擺晒pose影相，見到佢哋咁希望同大灣區融合，我哋都表示支持！」
民建聯喺個帖文度仲加咗「反對派忽然理性」、「身體很誠實」嘅hashtag（標籤）去形容件事，講緊乜嘢相信香港市民都有目共睹嘞。「Leung Yim」形容咖喱飯班人︰「忽然轉死性，今天的我打倒昨天的我。」「Chan Wing Kin」揶揄︰「又要開團『呃』街坊去（大陸），又要出鏡拉布大聲反對，做議員好忙㗎！」
民記發帖「撐」 「歡迎融灣區」
民建聯個post有咁多認同，咖喱飯即刻跌落地都揦返拃沙，事隔5個幾鐘後喺自己fb貼返另一張踎橋相扮係澄清，用佢躊躇滿志嘅表情去「質疑」點解大橋冇繁體字，聲稱自己係嚟「監察」政府，唔係支持大灣區喎，仲叫民建聯「成熟啲」添，真係越講越覺得民建聯踩正佢嘅痛處。
咖喱飯咁補鑊，正常人都「呵呵」置之，但佢有班支持者真係活喺唔同時空㗎，貼呢幅遲咗幾個鐘先出現嘅相喺民建聯個fb度，話呢幅先係「原圖」、民建聯「屈」人喎，睇嚟咖喱飯班支持者喺揦返拃沙方面嘅奶O都幾青出於藍。
咁其他花生友又點睇呢？恥笑太多，不能盡錄，其中「無待堂堂主」盧斯達就截圖轉截咗民建聯個post，揶揄咖喱飯︰「俾（畀）人串（寸）都是應該的。」 ■香港文匯報記者 鄭治祖