有乜嘢係缺德過抽死人水？咪就係貓哭老鼠假慈悲囉！日前藝人藍潔瑛猝逝，唔少媒體都有報道，其中《蘋果日報》更係用頭版去「紀念」佢。睇落好似好有心咁，但心水清嘅人就當然知道發生咩事啦，「無敵神駒」仇思達同其他網民就搵返壹傳媒之前對藍潔瑛嘅報道，發現壹傳媒呢十幾年以嚟都對藍潔瑛跟蹤同騷擾，施以精神滋擾同折磨，認為壹傳媒分分鐘係「殺死藍潔瑛嘅幫兇」。𠵱家人死咗再整個頭版紀念一番，到底係真心定新聞價值啊？
《蘋果》用頭版去紀念藍潔瑛，驟眼睇都以為係「良心報紙」，但神駒就整理咗幾篇《蘋果》喺藍潔瑛在生時對佢嘅報道、騷擾同抹黑，無論係出遊，感情生活，甚至係習慣都完全曝光晒喺公眾眼前，真係慌死人唔知佢落魄咁。
神駒鬧壹傳媒偽善無恥
神駒仲話：「壹傳媒、《蘋果日報》就是那麼偽善和無恥。藍潔瑛生前，遭受壹傳媒『狗仔隊』跟蹤，不斷報道其近況，並配以『黐線』、『四大癲王』等歧視性詞彙，施以精神滋擾和折磨。如今藍潔瑛逝世，竟在頭條報道兼附送海報，誓要消費死者的最後剩餘價值。有些盲毛《蘋果》讀者，還要留言大讚『有心』，真是令人哭笑不得！」
除咗神駒之外，當然有不少網友都對消費死者嘅行為表示不齒。「Ho Hong Wai」亦整咗一堆壹傳媒過往對藍潔瑛嘅報道，批評《蘋果》個頭版好假惺惺：「其實今日蘋果日報做晒封面致敬藍潔瑛好諷刺，其實呢十幾年來，追殺、騷擾、消費、恐嚇藍潔瑛最多既（嘅）就係壹傳媒。」
專門報道人落魄嗰一面
「Huppert Elle」鬧爆《蘋果》專門報道人落魄嗰一面：「真係好偽善！藍潔瑛有影迷post咗吤肏e嘅生活照，其實佢平時都唔係日日都好似傳媒啲相咁憔悴落魄，係傳媒特登揀D（啲）醜相黎（嚟）post，靚果（嗰）啲又唔講！」
「BiBi Kei」就話：「人哋已經息影仲係咁跟蹤佢，又話佢癲，唔癲都俾佢地（哋）搞到癲啦！」
人哋生前都已經俾《蘋果》逼到咁盡，連死咗之後都要俾人借題發揮，出個頭版就想當無數，你當香港市民盲㗎咩？■香港文匯報記者 何西