咩叫得寸進尺，欺人太甚？今次立法會九龍西補選，雖然民協（竹筍）講到明唔撐佢哋個「元老」馮檢基，而支持被「欽點」嘅工黨李卓人，不過主流反對派入面似乎仲有人死都唔信，係咁傳民協面一浸、底一浸，暗啞底幫馮檢基拉票。今次到民協深水埗區議員江貴生做主角嘞，佢日前突然幫民協一次過報返晒幫李卓人拉票啲更之外，仲嬲到講咗句「睇嚟我哋（民協）真係好好恰」，似乎係俾人嫌佢哋冇交足貨而要力證自己清白。不過佢又講得啱喎，自從今年初嘅「初選」風波之後，民協好似越嚟越冇地位，今次補選提出「初選 Plan B」仲俾人當耳邊風。再嘈？因住出年區選人哋食埋你啲區呀！ ■香港文匯報記者 陳庭佳
上次民協個麗閣社區主任李炯大街大巷幫馮檢基拉票，由於對方擺埋張相上網，所以俾主流反對派捉到正一正都無得好講，不過今次江貴生俾人傳「倒戈」就真係「No Photo No Talk」，似係路邊社消息居多。
江貴生fb嘆「我哋好好恰」
江貴生日前喺facebook大嘆「有無搞錯呀，夠膽死傳我幫佢」，雖然無指名道姓邊個係「佢」，不過係人都知係馮檢基啦。佢仲覺得自己個黨俾人恰到上心口：「呢個時候都要咁樣恰我哋，睇嚟我哋真係好好恰！」
「議會陣線」立法會議員區諾軒就呵返佢：「來來來，貴生，我們一起貼海報開街站。」
為咗表明對李卓人嘅「忠心」，佢仲擺咗幾張民協幫對方拉票嘅相上埋去，不過堆標籤（hashtag）就非常有骨：「圍內講嘢都唔使負責任㗎」、「講啦講啦繼續講啦」、「話到口中留半句理從是處讓三分」、「世態炎涼點滴在心頭」（見圖）。
以為咁樣就擺平咗？未必㗎，可能民協仲會俾人玩到出年11月𠻹！早前社民連個廢陶（陶君行）同以「時評人」自居嘅劉細良喺網台節目唱雙簧，後者一口咬定民協主席施德來等民協頭面人物支持李卓人，只係為咗出年區選繼續要「舐『泛民』啲票」，前者仲話如果民協唔撐李卓人，區選唔使摻佢玩𠻹。
白鴿揚言踩入老巢宣傳
而一直幫開李卓人助選嘅民主黨立法會議員一嚿雲（黃碧雲），噚日亦都補多刀，話民協「似乎有啲人唔係全力幫」，所以民主黨未來會踩落民協老巢深水埗加緊宣傳。
不過施德來似乎唔想民主黨嚟爭食，預告民協會喺周六安排大型街站活動，但就未知李卓人會唔會出席。
至於李炯幫馮檢基拉票呢鑊，施德來話已經提返對方民協會支持李卓人，黨員唔可以以個人身份行事，再犯就紀律處分的，但係李炯就話「未知」自己支持李卓人定「師父」馮檢基，又大爆到𠵱家都未收到李卓人團隊啲物資。
一場選戰搞到要命令大家支持指定人選咁，呢頭俾人嫌做唔足，嗰頭人哋又唔同你溝通，呢啲咪「泛民」囉。
立法會九龍西補選候選人除咗李卓人同馮檢基，仲有陳凱欣、伍廸希、曾麗文。