■陳淑莊（左）淚灑當場，搶晒余若薇（右）鏡。香港文匯報記者 何西 攝以為得電視節目先可以有預告？噚日公民黨舉行黨員大會兼換莊，創黨黨魁余若薇一早事先張揚唔會競選連任執委，就連報名表都無遞到，而喺眾人會見傳媒之前，就有黨工「預告」余若薇分分鐘會淚灑鏡頭前咁喎！最後喊就係喊，不過係連任外務副主席嘅陳淑莊喊到豬頭丙咁款，反而余若薇眼水都無多滴，人哋Last Day都俾你搶鏡成咁，陳淑莊呀，陳淑莊，你叫余若薇情何以堪呢？
公民黨噚日「選」出新一屆執委會，結果係有遞報名表嗰20個全部自動當選，其中18個仲要係上莊留低嘅，只有政策倡議執委王嘉盈同青年公民主席張鈞翹屬於新執委。
連任黨主席嘅袋巾梁（梁家傑）話，公民黨未來嘅重點工作方向會側重於地區上做好民生工作，絕對唔會畀人「堅離地」嘅感覺喎，仲好自豪咁話：「你睇譚文豪8日內開咗兩間九東辦事處就知啦！」譚文豪聽到就即刻反駁話係7日先啱，「由星期六到星期六嘛」，而袋巾梁就好似小學生上堂咁，即場計畀大家睇，「星期六至星期六咪8日囉！我有計過先㗎！」不過，地區工作並唔係話開多一兩間辦事處就做得好，亦都唔係話喺反對派啲「兄弟」度挖區佬過檔就可以當正自己幾咁疊馬㗎！
戇橋迴避政治 褪軚忽然民生
佢哋仲忽然「民生最優先，政治放一邊」，連任黨魁嘅戇橋（楊岳橋）被問到點睇國歌法本地立法時，就冇正面回應，仲話其實有好多民生議題更值得留意咁，睇落好似真係想一改政治行頭嘅風格，嚟個華麗轉身喎！不過講係咁講啫，公民黨同其他反對派政黨話重視民生都講咗咁多年，有咩實際成果，大家有眼得見啦！
呢次黨員大會嘅焦點之一就係余若薇退下火線，總幹事余心美就喺仲開緊閉門會議嗰陣同傳媒講定，袋巾梁喺會上有獻花畀余若薇，會見傳媒時可以重現畀大家睇，仲「預告」定余若薇可能會落淚喎！
預告喊無料到 主角縮配角哭
點知真係天氣不似如期，話就話會落淚，但余若薇由發表感言以至收花都係一滴眼淚都擠唔出，正當記者仲煩緊無相交嘅時候，企佢隔籬嘅陳淑莊就即刻淚灑現場，謀殺閃光燈。話晒都係人哋Last Day啦，搶晒余若薇焦點似乎唔太好，呢啲咪叫妹仔大過主人婆囉！ ■香港文匯報記者 何西
