■陳國強展示張超雄的爛橫額。 片段截圖「扮工」並唔係一般打工仔嘅專利㗎，話說撐「獨」嘅沙田區議員陳國強噚日落區做直播，周到工黨「假難民之父」張超雄塊橫額，俾颱風「山竹」摧殘後成3個月都仲未有人更換，鬧爆班反對派口口聲聲話政府善後工作呢樣唔好、嗰樣唔好，結果自己塊嘢爛到九彩就理都唔理，反對派呢鋪真係大大隻回力鏢飛返畀自己！而雖然隔籬「新民主同盟」咖喱飯塊橫額完好無缺，但陳國強踢爆佢掛住做鋸樹騷「扮工」，個幾月之後先肯換，「民生乜都係小事，民主唔堅持！」
陳國強噚日去咗馬鞍山頌安邨對出嘅行人路做直播，話張超雄塊橫額自「山竹」吹襲之後爛咗成3個月，喺條行人路度吊吊揈，而佢一直都有叫張超雄辦事處快手換返塊，點知人哋睬佢都傻！
點名鬧「咖喱」鋸樹做騷
佢又點名鬧埋隔籬咖喱飯，話雖然塊橫額睇落完整無事咁，點知原來都係「山竹」過咗成個幾月先肯換，揶揄對方喺「山竹」後好勤力咁落區「扮工」，搞咁多場鋸樹騷，但就唔肯即時執好自己啲手尾。
陳國強見到咖喱飯張橫額大大隻字寫住「民生無小事，民主要堅持」，點知其實都係得個講，話佢根本淨係識得鬧政府，仲幫埋咖喱飯重新改過句標語：「民生乜都係小事，民主唔堅持」，都真係幾貼切喎。
送張超雄「遺骸」歸物主
所謂送佛送到西，陳國強就唔似班反對派淨係得個講字，佢又真係將張超雄塊爛橫額送去佢辦事處，同時又計埋時要行幾耐先去到，原來都只係兩分鐘就得。不過佢今次又硬食閉門羹喇，惟有張塊殘骸擺喺辦事處門口地下。
陳國強之後就話，反對派長期霸住議席但又做唔到嘢，叫佢哋總辭但又掛住九皮幾嘢人工賴死唔走，仲揶揄班人連用兩分鐘換橫額咁簡單嘅嘢都做唔到，又點旨意佢哋「爭取民主」呢。
其他網民當然加把口恥笑班反對派啦。「Jeremy Lui」就揶揄咖喱飯：「唔係自己友『泛民』咩？點解『犯駁威』團隊唔理隔離（籬）個banner？」「Herman Ho」就暗寸咖喱飯係究極方丈：「畀人告你刑毁呀！」
其實班反對派政棍都係最重視議席同份糧啫，換張橫額呢啲民生小事，佢哋話之你咩，認真你就輸了呀！ ■香港文匯報記者 何西