■吳錦雄早前派發工作報告，竟然出現「素麗提提你」，內容明顯係抄襲同黨另一個區議員曾素麗。有時寫嘢，「參考」吓人哋都係好常見嘅，但懶到人哋個名都唔改，就似乎有點那個嘞。話說民主黨沙田區議員吳錦雄早前派發自己嘅工作報告，竟然出現「素麗提提你」呢一句。一個麻甩佬點會自稱「素麗」咁重口味嘅呢？有心水清嘅網民就話，報告嗰段嘅內容明顯係抄襲同黨另一個區議員曾素麗，所以先會男變女，「錦雄變素麗」。
網民發帖寸爆吳錦雄
「泛民可恥行為事件簿」fb專頁昨日就發帖，話明明係麻甩佬嘅吳錦雄，喺早前有關派發4,000蚊關愛共享計劃單張嘅工作報告裡面，突然出現「素麗提提你」呢一句，擺明係抄同黨曾素麗嘅單張，但就懶到連改都費事，真係失禮街坊。
帖子寸爆吳錦雄：「『素人』我識，『素顏』我識，但兩條麻甩（吳及其社區主任張宇添）叫素麗，我只會××。曾素麗，你的黨友copy and paste都做得咁差咁求其，點會有心為市民服務啊！！？」仲標註「又係坑渠糉吳錦雄」、「無心做服務就唔好霸住個位啦」、「民主黨最無恥」。
渠邊包糉瘀事成籮
坑渠糉係咩一回事？話說吳錦雄喺舊年6月，俾人影到佢安排成班義工喺3號強風及紅雨下，喺�嘅大圍顯徑區議員辦事處門外包糉，仲有圖有真相，見到成個地下濕晒，義工就喺坑渠邊做嘢，而唔少包糉嘅用品就放晒喺地下甚至俾人踩住。
照片在網絡瘋傳後，吳錦雄自然俾網民鬧爆，話佢用黑心糉嚟「回饋」街坊。吳錦雄就喺fb發聲明回應道歉，但就將班義工擺上枱，話呢班街坊咁熱心發揮社區互助互愛的精神，用金錢都買唔到喎。
其實吳錦雄瘀事又點止一單？包括民主黨等反對派，喺高鐵香港段同港珠澳大橋未開通前，就猛話呢啲項目係「大白象」，仲「好危險」咁，但到起好咗嘞，成班反對派就仆都仆唔切咁搞高鐵團、大橋團，吳錦雄正正係其中之一：佢喺舊年11月俾人踢爆搞咗個去中山順德「純玩兩天團」，出發就經港珠澳大橋，返嚟就坐高鐵直達西九龍站，仲雞乸咁大隻字標榜「一次過去晒兩個基建」。唔少人都批評吳錦雄以至成班反對派：「無恥真係天下無敵！」
■香港文匯報記者 陳川