■曹永廉獲不少巿民邀合照，人氣爆燈。香港文匯報訊（記者 植植）曹永廉（阿廉）、漢洋與譚嘉荃及星級化妝師Will Or，日前為美容店開幕擔任剪綵嘉賓，吸引大批巿民圍觀，場面墟冚，有份主演熱播劇《大帥哥》的阿廉大受歡迎，獲不少巿民索合照，人氣爆燈。
54歲的阿廉，不單止人氣勁，保養得宜的他，近日更獲網民封為「冰封俠」，問到阿廉的美容心得，他笑言後生時沒有特別保養，純天然，但有感近年出現衰老跡象，故此多了關注儀容，多做保濕、敷面膜、Facial等，又會注重健康飲食少糖少鹽，「其實最重要係心態，開心，個樣就會後生。」
催促孤寒蕭正楠派利是
問到阿廉身邊朋友中，覺得邊位跟他一樣保養得宜？他笑言身邊個個朋友都保養得不好，他更點名指鄭嘉穎、黃智賢、蕭正楠老得快，他說：「我身邊個個朋友都keep得唔好，你問我身邊邊個朋友老得好快呢？一定係最老友嗰幾個，大家都知道啦，嘉穎皺晒皮，另外黃智賢個樣睇落仲大過我，但其實佢年紀係細過我；仲有蕭正楠，有啲劇佢可以做我阿哥，佢真係要檢討下！所以喺我身邊嘅人老得快，不代表我後生，希望佢哋注重下，尤其是嘉穎唔好咁勞碌。」
提到《大帥哥》收視高、口碑好，阿廉亦聽到不少同事大讚劇集好睇，令他感到十分高興。農曆新年將至，阿廉表示將陪伴家人四出拜年，問到他會否叫已宣佈婚訊的蕭正楠封大利是給他？阿廉笑說：「今年佢揚晒，都幾大鑊！不過佢好孤寒！唔會封畀我，叫佢封畀我啲小朋友，我啲仔女曾經當佢係偶像，雖然佢𠵱家結咗婚，我個女對佢冇晒興趣，但都希望佢會封返封大利是畀佢哋。」