■李永達被判罪成當天，李太陳樹英邀請民主黨黨友食日本菜午餐。 劉慧卿fb圖片「飯民」嘅情緒有時真係好難捉摸。「佔中九男女」日前被裁定罪成，宣判前後成班「飯民」都講到件事幾咁悲壯，但其實庭外鏡頭背後，佢哋又好似好開心咁。日前被判罪成後，李永達老婆就請咗民主黨班人食晏，成班人仲笑晒咁開心大合照，「100毛偽人」盤菜瑩子（柯翠婷）亦都話︰「點解你哋要為佢哋唔開心？佢哋好開心喎！」
民主黨前主席劉慧卿星期二嗰日喺facebook出post話︰「『佔中九子』被區域法院宣判九人有罪後，李永達太太陳樹英邀請我們食日本菜午餐。」個post仲有成班人嘅合照，坐喺中間嘅李永達，同一班黨友包括胡志偉、林卓廷、何俊仁、尹兆堅等，笑晒口咁合照。
網民：以為判無罪
乜罪成都要慶祝㗎咩？唔少人就喺劉慧卿個post度留言寸民主黨班人。「David Poon」直斥︰「不知所謂，鎂光燈後面大魚大肉，在鏡頭前面扮晒嘢。」「Joey Yam」話︰「唔講以為判左（咗）無罪。」「Kam Fung」反問︰「咩心態？」「Lai Tin Sang」就模仿黃碧雲口脗︰「好在有告你咋，我哋先有日本餐食。」「Plum Kwok」揶揄︰「光環已拎，仲唔慶祝下？」
fb專頁「傑出男公關」都留意到呢個咁出色嘅post，截圖轉載話︰「其實做乜啫？點啊？叫做喺天后廟前收到廿蚊陀地費，成班去篤牛雜賀一賀啊？男公關差啲以為李永達被判無罪！」「拓跋烈」留言︰「哦，咁即係認同判決啦。咁又係嘅，藍血人入去坐咪當生活體驗囉，出返嚟大把嘢撈又無負擔。」「Paco Yung」恥笑話︰「今餐係民主最黑暗嘅一餐......」
被揶揄講嘢冇腦
有啲網民就唔抵得「飯民」自己嘻嘻哈哈，但其他人批評佢哋就好似十惡不赦咁。「Kian Lee」就出文話︰「有時邊有得怪我哋口賤？『留案底會令人生變得更精彩』係邊個講㗎？係『泛民』新星關鍵一席楊岳橋呀。『只有向他們跪低的人才可參政？』係邊個講㗎？群星拱照嘅劉小麗呀。『好彩有告你咋，無理由唔告民主黨。』係邊個講㗎？係八婆黃碧雲呀。話我哋口賤之前，叫你哋班×頭用下個腦先講嘢啦不如。」
盤菜瑩子就轉載咗「Kian Lee」個post話︰「好精警。點解你哋要為佢哋唔開心？佢哋好開心喎！」「Ngan Hok Kin」亦話︰「民主黨幹部食日本嘢慶祝仲開心過你。」「Hongching Yeung」再寸啲話︰「你班垃圾只係停留喺口賤呢啲咁低lv嘅程度咋，民主黨力求進步索性去食飯慶祝添。■香港文匯報記者 甘瑜