縱暴派批出唔夠200萬 分錢給「民陣」搞遊行
個個都話幫「義士」籌錢，你估嗰啲所謂「義士」真係可以受惠咩？由一班政壇長青攝石人，包括陳日君、吳靄儀、許寶強、何秀蘭及何韻詩做信託人嘅「6．12人道支援基金」，由6月中到8月底籌到超過7,400萬蚊，但批出嘅款項就唔夠200萬蚊，當中仲要分咗20幾萬畀「民陣」搞遊行同籌款等音響開支，引起唔少捐款者質疑個基金呃錢。「港獨」分子陳浩天就喺facebook爆料話，有個「手足」俾人扑傷個頭，想向基金申請醫藥費，結果等到個頭都好返。有網民就揶揄，叫啲「手足」以後唔好話要申請醫藥費，「下次話要整音響。」■香港文匯報記者 甘瑜
對啲煽暴派嚟講，要正當賺錢真係好難，但搞亂香港再叫人捐錢去支援「義士」就易好多。「6．12人道支援基金」月初公開咗截至上個月28號盤數嘅概況，發現佢哋籌到7,428萬蚊，但批錢速度就遠遠比唔上籌錢，只係得唔夠200萬蚊，唔少網民都質疑個「6．12基金」點解批得咁慢咁緊，攬住嚿錢唔幫「義士」係為乜。
呢兩日，「6．12基金」公開埋盤數嘅詳情，當大家以為近200萬蚊都係用嚟幫「義士」嘅時候，事實又喺度恥笑�哋愚蠢嘅捐款，原來200萬蚊入面仲有21.9萬蚊係用嚟畀6月16日嘅遊行同籌款嘅「音響開支」，然後立法會示威區搞法律講座，又用咗近3萬蚊去「音響開支」度。再睇返，第一個跳樓嘅所謂「義士」，個喪禮都只係批咗18萬蚊左右，佢嘅「犧牲」仲平過啲音響。
僅1人次獲「心理輔導支援」
咁到底俾人用嚟籌款嘅「義士」得到咩幫助呢？煽暴派吓吓都「宣傳」到「拉好多人」、「傷好多人」、「好多人被迫離開香港」咁，但醫藥費、律師費、緊急經濟支援加埋都只係120萬蚊多啲，幫到132「人次」咁話，確實有幾多人就唔知啦。又例如「基金」為71人次提供「情緒支援費用 / 轉介服務」，事實上攞到「心理輔導費用支援」嘅得1人次。
講數字又唔夠具體嘅，但網上呢幾日都流傳唔少個案。其中陳浩天就出post話︰「有手足被扑傷頭，同『6．12』申請少少醫藥費睇下（吓）個頭，都好似唔止一個月了，個頭等下（吓）等下（吓）都好似已經好番（返）。」唔少網民都留言揶揄，話下次試吓申請「音響費用」可能方便快捷啲。
「Abalone Cheung」就爆料話︰「『6．12』見自己友住酒店就極速批錢。」好多網民話呢啲咪叫「親疏有別」囉。
500元保釋金仲要「借住先」
fb專頁「hkpoliticalmemes」都整咗好多問題同對話截圖去質問「6．12基金」，但對方就冇覆。啲對話截圖包括有獲支援者，竟然攞到4,500蚊去應付電話、衣物、交通加生活費，對方都忍唔住話︰「佢當我識光合作用？」有「手足」話自己衰咗要上庭，打畀「6．12基金」，但對方「乜都唔覆」；有人就攞到500蚊保釋金，仲好似只係「借住先」。
有人就直接傳訊息問「6．12基金」點解批得咁少錢、會唔會幫走咗去台灣嘅「義士」，對方就官腔話要保障事主私隱，所以唔會回應個案跟進情況，網民就反駁︰「啲錢大家捐但你地（哋）咁用真係對唔對得住香港人呀？」
「Chung Cheuk-ning」就出post話︰「『6．12人道支援基金』成日強調自己同『民陣』係分開嘅，基金籌得嘅善款只作支援『義士』用途，我×你老×，咁你616『民陣』搞嘅遊行有乜×嘢理由係出612條數？仲要廿幾萬，係廿幾萬買音響喎，『民陣』你老×咁多年嚟搞活動啲音響器材係用完一次就掉一次㗎？（租器材就更加唔使咁多錢，兩萬都搞得掂！）」
「民陣」呻窮搵「6．12」找數
唔知係咪見人鬧得勁，「民陣」召集人岑子杰就話，因為當時「民陣」財政「不穩健」，所以請「6．12基金」畀錢喎， 但「二十萬已經不是很貴」。「6．12基金」就話，當日「各民間團體嘅街站，都係為『6．12人道支援基金』籌款，並將善款全數交比（畀）基金。」
呢啲真係信不信由你，但政府廣告都有話︰「咪畀錢中介。」