民陣岑子杰「遇襲」，邊個最鍾意攞嚟宣傳？除咗岑子杰個競選團隊光速印文宣派街坊，佢所屬嘅社民連亦都攞嚟大肆宣傳，話佢「兩度街頭遇襲」，但「種種暴力『恐嚇』仍無阻我們堅持『五大訴求，缺一不可』的信念」喎。長期俾網民叫做饅頭雄嘅長毛梁國雄就擺正喺張宣傳照中間，右邊就係眼泛淚光嘅岑子杰，睇嚟網民畀佢呢個綽號，確實唔係浪得虛名。
社民連近年越撈越霉，長毛被DQ後喺立法會入面滅埋黨，個主席吳文遠同「村短」黃浩銘就從來無成功當選過，𠵱家有岑子杰靠民陣同最近社會亂局彈出，該黨似乎覺得自己見返啲曙光。
即刻出post招募區選義工
在岑子杰「遇襲」當日，社民連即刻喺facebook出post招募區選義工，話今次區選佢哋以「最強團隊」出擊，長毛選九龍城土瓜灣北；岑子杰選沙田瀝源；阿牛（曾健成）選東區樂康。佢哋抽晒今次社會亂局嘅水，話要「對準建制，全力出擊」，用區選去表達市民「五大訴求」喎。真係想知如果冇「五大訴求」，佢哋攞咩叫人支持嘞。
成篇文嘅戲肉，當然係岑子杰「兩度於街頭遇襲」，同埋冇乜人知嘅阿牛工作室「被惡意破壞」，但佢哋話自己冇驚過，會堅持「踢走暴政，清算建制派」喎。咁我諗全世界都睇得出佢哋咁高調宣傳被襲，真係一啲都唔驚嘅。
唔知係咪網民唔想咁快炒車，呢啲帖文似乎唔係好熱，喺幾十個留言入面都有唔少人寸佢哋。「Ngai Stephen」就話︰「最鍾意請義工......因為唔使畀錢、仲可以用完即棄，所以暴動現場超多『義工』，『義救護』、『義士』、『義後勤』、『義媒』、『義務落雨開遮』、『義務圍毆巿民』，『義務掟汽油彈放火』、『義務裝修』。」
參選土瓜灣北嘅仲有民建聯主席李慧琼；參選沙田瀝源嘅仲有公民力量黃宇翰；參選樂康嘅仲有無黨派嘅李進秋。 ■香港文匯報記者 甘瑜