■朱晨麗出訪杜拜，開心到飛起。香港文匯報訊 （記者 李思穎、梁靜儀）朱晨麗（朱朱）與緋聞男友何廣沛早前到杜拜合拍旅遊節目《3日2夜》，朱朱為對方獻出多個第一次，又得到他悉心指導，拍攝過程非常愉快，朱晨麗與何廣沛感情更上層樓。在拍攝過程中，朱朱又堅持要高空跳傘，怕將來年紀大無膽跳。
朱朱和何廣沛在近日熱播中的劇集《大醬園》扮演一對冤家，最後結成夫婦，之前就一齊去杜拜拍旅遊節目《3日2夜》，二人朝夕相對幾天，看來感情都昇華了不少。
朱朱為此更獻出多個第一次，她說：「第一次同何廣沛拍旅遊節目，第一次出埠拍呢類節目，第一次去杜拜，第一次去沙漠，第一次玩刺激高空跳傘，本來劇組取消咗呢個項目，但我極力要求，難得有呢個機會，點都要玩一次，年紀大未必再有呢個膽，趁𠵱家仲夠膽就玩下留做紀念。」
珍惜每一次拍攝機會
朱朱表示以往對杜拜印象只得天氣熱及金碧輝煌，沒想到親身感受過後是兩回事：「去到成個人都好舒服，建築物好靚，去旅行可以選擇杜拜，仲有室內滑雪場，麻雀雖小但設備齊全，乜都有得玩。」
為了今趟旅程，朱朱特別訂做了幾套靚衫，連髮型也視乎不同環境及內容而轉變，過程中也趁機拍下不少靚相，因她不知會不會是最後一次拍，所以會把握機會，做人亦如是，總是抱着最後一次心態就會做到最好，她好珍惜每一次拍攝機會，各方面都會做足準備。
談到與緋聞男友同行，朱朱表示與對方已合作很久，並非常有默契，由於何廣沛拍攝綜藝節目經驗較多，所以拍攝期間也會給她指導：「佢會話畀我知點樣做會再好啲，撞出火花同話題，令到成件事會再搞笑啲，觀眾亦會投入啲，用學習心態去拍，所以拍得好愉快。」
另外，何廣沛昨日在將軍澳電視城為新劇《食腦喪B》開工，新冠肺炎疫情持續擴散，何廣沛表示公司亦着重大家的健康，近日亦有安排增加演員休息時間，他說：「暫時開工安排都幾好，平時拍劇休息唔夠，但𠵱家係每日都有六至八個鐘瞓覺，以前啲通告係緊接，𠵱家外景減少咗，通常朝早五六點瞓，中午十二點左右返工，以前收工返屋企沖個涼就再開工，𠵱家有足夠體力應付拍攝，唔會因為唔夠休息個腦塞晒，安排非常之好。」
今天是情人節，何廣沛表示要開工，與張彥博、郭子豪拍酒吧戲。問到可有跟緋聞女友朱晨麗提早慶祝情人節？他說：「都好耐冇見，佢屋企有啲事，有短訊問候佢，佢都有覆我，情緒都OK，畀啲空間吽A唔煩佢。」至於可有買定情人節禮物給對方？他笑說：「冇啦，𠵱家都冇乜出街。（送口罩做情人節禮物？）嘩，好珍貴喎，自己存貨都唔多，要就住使，好彩我哋套劇有『買手』江嘉敏幫我哋上網買口罩、搓手液。」