■張兆輝與姚子羚互相信任。香港文匯報訊 （記者 梁靜儀）張兆輝（輝哥）與姚子羚、蕭正楠及洪永城主演的無綫劇集《黃金有罪》，播映以來口碑理想，劇集今晚（14日）迎來大結局，輝哥有一場激動喊戲吸睛指數爆燈。
繼姚子羚飾演的「水敏晶」被車撞之後，陳瀅同洪永城飾演的「水敏婷」、「莊帶喜」又會被殺手追殺，而蕭正楠飾演的「錢永進」因與人大打出手，性命危在旦夕，究竟箇中原因是否跟輝哥飾演的「榮木桐」有關則有待揭曉，但可以肯定，輝哥於最後兩集演技再度爆發，其中一幕輝哥在子羚被車撞後，收到對方寄給他的文件，令他悲從中來，失去方知自己最愛「水敏晶」，連場爆喊。
對於連場爆喊鏡頭，輝哥直言：「絕對戲味十足，好多時喊戲得自己一個，嗰幕講我收到子羚寄給我的文件，跟住我好自責，之後就要喊，拍嘅時候就只係對住一個公文袋。」
人為錯誤毁完美一Take
拍攝當日，輝哥一早已經自己設計好場戲，希望一Take過完成，可是當日出現了一些人為錯誤，令之前他覺得完美的那一Take沒有了，所以輝哥覺得有些失望同無奈，希望觀眾第二Take也收貨！
除了喊戲之外，輝哥跟子羚亦有演親熱戲，問到兩者哪一類較難演？輝哥直言難度不相伯仲：「其實喊同親熱戲都好需要講感覺，可能因為同子羚都好信任對方，所以拍攝前不用講太多、一陣個位點就點就，出來效果好自然。」
劇中有不少經典場面，輝哥表示最深印象是講他收到信，講阿爸已死那一幕，因為原本收到阿爸寄來的信是好開心，但原來講他自殺死去，由冇情緒去到有情緒一Take過。見證輝哥多場喊戲的姚子羚，大讚對方喊功驚人：「喺泰國拍攝嗰場輝哥喊戲，其實嗰日我好緊張，因為知道輝哥呢場戲好重要，當時剛開拍，同輝哥未太熟絡、未Warm Up，我喺旁邊驚NG會影響咗輝哥，好彩拍攝得好順利。」
談到拍攝以來最難忘的場面，子羚指是跟輝哥分手的場面：「分手嗰幕好難忘，情緒起伏好大，其實我係好鍾意『榮木桐』，奈何佢未婚妻返來，我哋要分手，我仲要講好多反話，不斷祝福佢，將痛苦放喺心中。」