■工黨原先出圖亂講基本法內容（左），其後改圖當冇事（右）。 網上截圖堂堂一個政黨都可以隨口噏當秘笈？工黨上星期五喺facebook貼咗張揶揄警隊嘅圖，仲話根據基本法第一百五十四條，「衛生署有權叫『黑警』去隔離營當更」喎，乜基本法寫啲咁嘅嘢㗎咩？全國政協副主席梁振英（CY）都睇到嘩一聲，話工黨錯得離譜，踢爆話基本法第一百五十四條係關於特區護照、旅行證件和出入境管制，同衛生署、警察的職務風馬牛不相及，「工黨算是泛民大黨，而且有各級議員不停食政府俸祿，對基本法認識的水平竟然低下至此。」
除咗張圖，工黨仲有文字post話「警察不是抗疫逃兵」，內容同樣提到「根據」基本法第一百五十四條，衛生署可以要求警方協助咁話。CY追問︰「我們再給工黨一次機會，請工黨告訴大家，基本法哪一條『授權衛生署叫警察去隔離營當更』？如果答不出，罰抄基本法全部條文兩次。」
至於工黨嘅回應，當然係刪post改post當睇唔到，CY繼續追擊佢哋「連基本法都可以作假」，「被揭發亂引基本法後，改了。這種政黨，可信嗎？」
唔止CY個fb度有一大班人鬧工黨，工黨個fb同樣都俾網民追擊恥笑。「Johnny Yip」話︰「想引用基本法去誣蔑（衊）警察，知道出事就淆底改圖！垃圾工黨真係當之無愧！」「Hoho May」亦表示︰「俾梁振英指出你錯了都唔出聲明向市民道歉，改圖了事。」■香港文匯報記者 甘瑜