■「黃店」貼出「不招待祖國同胞」卻仍見使用支付寶程式的告示。 網上圖片「黃藍是政見，賺錢最重要」就係「黃店」獨特嘅經營方針。早前有「黃店」貼出「不招待中國人」或「不招待操普通話人士」嘅告示，直至平等機會委員會出嚟話食肆無理拒絕招待客人可能觸犯條例，情況先稍有收斂，點知近日又有食店話員工唔識講普通話，所以唔會幫「祖國同胞」點餐，但有醒目嘅網民就見店外貼住使用支付寶程式嘅告示，笑佢係偽「黃店」，仲讚佢有「生意頭腦」，可以賺晒唔同政見顧客嘅錢呢。
從網民上傳嘅照片可見，店舖告示上面寫住「普通話：完全不懂」、「English（英語）：Limited（有限）」、「手語：學習中」同「『香港話』：好掂」，而支付寶程式告示上嘅「內地」兩字亦被塗污。
唔少網民都話自己唔會去，皆因唔識「香港話」，只識廣東話，「Kenny Fung」揶揄：「有啲想去食，但我唔識『香港話』，點算！」「Philip Kang」就問：「粵語、Cantonese（粵語）、廣東話、廣府話就有，咩係『香港話』？」「Pony Wong」就比較好奇：「如果台灣人同新加坡人入去，啲員工會唔會突然識返普通話？」
至於嗰張支付寶告示亦引起熱議，「jason law」就話要幫食店老闆上堂，「（支付寶）本質咪又係屬於內地，知唔知邊個Alibaba（阿里巴巴）同螞蟻金服？係開發同營運支付寶嘅內地公司呀！」「黃得得」就揶揄︰「賺錢最重要，身體最誠實。」「Ellie Chan」打賭：「我就唔信佢啲食材同家俱（具）唔係中國產品！」■香港文匯報記者 鄭治祖