■「中箭」口罩寫「NOT MADE IN CHINA」(紅圈示)，卻無寫產地在哪裡。所謂「橋唔怕舊，最緊要受」，講緊嘅係喺2月靠賣高價口罩搲捐款嘅「中箭（香港眾志）」。話說曾鼓吹「港獨」同「自決」嘅「中箭」日前忽然「愛中國」，一度聲稱以258蚊嘅價錢嚟賣�哋「辛苦搜羅」返嚟嘅口罩，話扣除成本嘅收益會用於支持抗疫同「抗爭」，但轉頭就俾大批網民投訴買一盒口罩會被扣10次錢。點知仲未交代退款完成未嘅「中箭」已經「食過翻尋味」，稱最近又採購咗過百萬個口罩，將以100蚊盒嘅「成本價」賣畀黃店發售，但就自行製作新包裝盒，唔肯公開批口罩嘅來源地。有此前疑「被捐款」嘅苦主即刻出嚟追數，大鬧「中箭」唔公開口罩產地，已違反《商品說明條例》。
「中箭」秘書長黃之鋒（河童）噚日舉行發佈會，聲稱由於上次公佈喺洪都拉斯採購口罩後，「引嚟大批中國商人到當地搶購」，導致嗰度嘅口罩價格急升，所以今次拒絕透露來源地喎。
上次被呃錢網民現身追數
大批上次被「中箭」呃錢嘅網民即刻現身追數，「Teddy Yip」一嚟就問：「商品（說明）條例要講明產地的。上次收多左（咗）啲口罩錢幾時退？」「Kamtat Cho」亦重提舊事：「『眾志』用中國產品當香港人水魚，一盒口罩近三佰（百）元，簡直當港人低能！」「Amber Miller」就問：「又準備發國難財？」「Hunter HK」就話：「又嚟黃色敲詐圈！」
其實，近日唔少人都擔心會買到劣質口罩，消費者委員會、海關同警方都曾呼籲市民唔好買來歷不明嘅口罩，今次「中箭」講明唔夾開批口罩嘅產地，淨係話獲得「美國材料和試驗協會ASTM」第一級認證。
網民指重新包裝肉酸
「Kwai Fong Chow」就質問：「無產地唔知會唔會係老鼠貨？重新包裝咁肉酸仲用到$100/35個咁貴嚟籌期（款）！」「Alex Chan」揶揄：「淘寶貨點敢講比（畀）你知呀！」「Jalan Luk」就指：「中國制（製）造可能好的，最怕係山寨口罩『廠』！」 ■香港文匯報記者 鄭治祖