■ 有黃醫護聲言集體「劈炮」，網民促「先辭為敬」。 fb截圖今年2月班黃醫護話要「罷工救港」，又嫌三嫌四話醫管局冇提供足夠支持，結果全世界面對疫情都資源緊絀，外國醫護笠住垃圾膠袋都照上陣，更見呢班香港黃醫護不知所謂，而佢哋都漸漸潛水，但原來仍有人不知悔改。日前，facebook專頁「HA Secrets」就有黃醫護大大聲聲問罷工「有咩做錯」，不滿被算賬，仲恐嚇話「如果我地（哋）8,000人一齊辭職，唔知你驚定我地（哋）驚呢」。點知網民就反應踴躍，紛紛留言叫呢啲無品醫護快啲辭職，唔好害香港人。
罷工被算賬 發晦氣謀「攬炒」
有罷工醫護日前透過「HA Secrets」匿名出post，話佢哋罷工係「為廣大市民要求政府封關」，問自己「有咩做錯」，「如果要清算，『反恐零』（意指醫管局主席范鴻齡）應該第一個出來引咎辭職，你究竟做過啲乜，......如果我地（哋）8,000人一齊辭職，唔知你驚定我地（哋）驚呢？」
個罷工醫護仲揚言自己唔驚「秋後算賬」，仲叫醫管局方面「唔好淨係得個講字，要坐言起行」，又話自己唔信喺香港會餓死，「冇野（嘢）做最多搵過第二份，如果冇左（咗）『良知』，就搵一世都搵唔番（返）。俾（畀）我再揀多10次，我都一定會行出嚟罷工。」
講到咁豪氣，咪又係匿名出post。唔少網民都反應踴躍，不過係恥笑佢囉。「David Kwok」揶揄佢報大數話︰「8,000個罷工，噗哈哈哈哈哈。」「Scott Scott」就支持罷工醫護辭職話︰「你地（哋）一早應該辭職啦，大把聲音叫你地（哋）一齊收皮，你失明定失聰？」「W H Wong William」亦話︰「唔好又『如果』，唔好又『8,000人』了，你辭咗先啦，唔好做第7,999個呀！」「Alan Lo」激動表示︰「支持集體辭職！醫院少一個黑醫護、就多一份安全！」「Wong Kimmberly」附和︰「我係土生土長香港人，你真係快d（啲）辭職啦，有良心就唔會掉低病人唔理走去罷工啦，你地（哋）要為自己既（嘅）行為付出代價囉。」「Daniel Wilton」食晒花生︰「辭咗職先，唔好得個講字，我想睇邊一邊硬淨啲。」 ■香港文匯報記者 甘瑜