■ 網民揶揄《蘋果》嗌「歸隊」猶如「送頭」。 fb截圖泛暴派前日大力吹雞，叫啲「黃絲」喺太古城中心商場「和你唱」，黃媒《蘋果日報》更公然喺facebook叫佢哋「歸隊」𠻹。結果呢啲違反限聚令嘅行為，當然就係會俾警察拉啦，有「黃絲」就鬧爆所謂「歸隊」猶如「送頭」，鬧爆吹雞者害死「手足」。
近日陸續有參與黑暴嘅暴徒被判監，有法官亦指「懲罰性刑罰不能避免」，值得一班「黃絲」深思，要為自己行為負責。黑暴今次唔怕疫情大爆發，想搞千人大合唱，唔只阻人做生意，隨時令唔少年輕人前途盡毀，非常不智。
好似「無名軍師」就話：「歸你老×，送哂（晒）頭啦，開心啦你，畫面好靚呀！」「Wilson Ng」則覺得係班有錢收嘅暴徒判頭想賺安家費，「有關機構中左（咗）tender（投標），要係（喺）contract（合約）完之前送番（返）足夠人頭。」「Kong Man Hong」就揶揄：「人人有案底，就會有抗體，『手足們』，今晚記得爭取番（返）一個案底！」
愧對醫護 同道鬧爆
《蘋果日報》呢頭向班「黃絲」告急，話自己虧損嚴重，轉頭又幫香港倒米，叫人落商場搞事，亦令唔少「黃絲」網民質疑：「醫護為我哋返工，點解我哋唔可以為佢哋留喺屋企？香港大爆發嘅時候邊個負責？點解我哋要咁樣害醫護『手足』？」「Trixia Pat」亦問：「成班人對得住醫護咩？陣間大爆發點算！」 ■香港文匯報記者 黃書蘭