網上宣傳建「香港共同體」 政界：絕對唔能夠入立會
香港經歷去年的黑暴，市民、社會正處於艱難時期，現時要「吹雞」要人出街可能有啲困難，但激進「本土派」仍公然「播獨」、鼓吹「香港民族論」，更藉所謂嘅「運動紀念日」，「吹雞」要求港人繼續「抗爭」。岑敖暉、葉子祈、陳緯烈呢啲「獨派」區議員，陪同有意參選新一屆立法會選舉嘅「素人」鄒家成及馮達浚，多次喺地區擺街站講解所謂「民族概念」，更不停喺facebook宣傳建立「香港共同體」嘅「理想國度」等。香港政界人士在接受香港文匯報訪問時表示，佢哋明顯已唔擁護基本法，違背區議員守則，更唔符合立法會參選資格，應盡快DQ，絕對唔能夠畀「獨人」入到立法會。
■香港文匯報記者 杜思文
有意出選新界東嘅鄒家成噚日就叫埋西貢區議員葉子祈同陳緯烈，喺坑口擺「獨」街站宣揚「香港民族意識」，講述香港人嘅「共同經驗」，書寫屬於所謂香港人自己嘅歷史，奪回「話語權」。葉子祈亦貼相支持，又話日後會「出沒」喺將軍澳唔同地方擺站講解「香港民族概念」，「傾下」港人如何應對「目前環境」。不過，陳緯烈去咗就唔夠膽喺自己facebook宣傳喇。
鄒家成上月亦同荃灣區議員岑敖暉喺沙田設「拒絕殖民，民族抗暴」街站，仲派發寫咗「催化香港民族覺醒」、「揭示中國帝國主義真相」、「香港民族正式遍地開花」、「生死相依」嘅「港獨」文宣。
「積極考慮」參選立法會九龍西直選嘅馮達浚更喺facebook發長文稱，要構建「理想國度」，話嚟緊將會有眾多「紀念日」，例如「七一立法會」、「7．21」、「8．31」等，暗示大家要喺呢啲日子出來「紀念」，並繼續鼓吹「攬炒路線」，要大家記住當初「不惜一切」嘅決心，秉持「香港民族」嘅堅毅，各自「推動抗爭前途」，仲要「不懈地追求我們的理想國度，建構香港共同體。」
梁志祥：播「獨」違立會誓詞
民建聯立法會議員、元朗區議會前主席梁志祥直言，其實現在宣傳「港獨」已經犯咗港區國安法，只是港區國安法至今仍未有法律細則，「唔知會告佢咩罪名，有咩刑罰，諗住𠵱家「播獨」唔使驚，實在係蠢。
他續說，「港獨」違反立法會誓詞，如果「獨人」要參選立法會，選舉主任都一定要考慮呢啲「港獨」言行。港區國安法訂立細則之後，相信亦可以DQ現任「港獨」區議員，政府屆時要嚴正執法。
葛兆源：不容「獨人」進立會
工聯會荃灣區議員葛兆源亦話，一定唔可以畀「獨人」入到立法會。「岑敖暉呢啲『獨人』宜（𠵱）家喺區議會上肆無忌憚鼓吹『港獨』，提案完全係『無厘頭』，只識消費死者、蠱惑青年，區議會已經被搞成咁，立法會完全唔（不）能畀佢哋參選。加上啲『獨人』已經『識得玩』，希望港區國安法未來一定要嚴格檢控，睇埋言行同動機，唔好再令香港青年被毒害。」
顏汶羽：拒擁基本法 不能當議員
民建聯副秘書長顏汶羽話，任何人鼓吹以至推動「港獨」都係違反基本法，亦唔係香港市民期望。任何人不擁護基本法，就唔能夠擔任公職人員，包括各級議會議員。「香港社會已經畀黑暴搞到充滿矛盾重重，呼籲大家一同讓香港重回正軌。」