■馮達浚發帖，老屈「律政司帶頭謀殺傳媒第四權」等云云，被「手足」鬧爆。馮達浚fb截圖《熱血時報》記者馬啟聰及城大編委攝影記者黃家豪因涉嫌喺舊年7月1日衝擊立法會被控，日前提訊時更被加控「暴動罪」。攬炒派「半島連線」召集人馮達浚為此就喺facebook發帖話，今次係香港第一次有「記者」因採訪而被告暴動云云。不過，馮達浚好快就畀班網民手足批評，佢喺帖文只提「城大編委記者」，對馬啟聰隻字不提，鬧佢「怕影響選票唔講熱狗（熱血公民）」。
馮達浚日前發帖話，「律政司帶頭謀殺傳媒第四權」，「有12位闖入立法會手足今被加控暴動罪，當中包括城大編委記者。這是香港第一次有記者因採訪而被告暴動......我身為傳媒工作者，絕不會投降」云云。
不過，唔少網民就寸佢唔提《熱血時報》記者都被加控。「基歐」話：「《熱血時報》記者馬啟聰被加控暴動罪你就隻字不提，刻意無視！」佢跟住都死死地地跪低，喺篇帖文尾段加返個「補充」咁講：「《熱血時報》記者馬啟聰同樣被加控暴動罪。我們反對政權打壓任何一名記者的採訪工作，不論記者本人和其所屬新聞機構的立場和背景。」
網民揶揄「熱狗就是原罪」
不過，唔少網民就繼續鬧。「Matthew Cheung」就質疑佢嘅補充：「乜野（嘢）叫『不論記者本人和其所屬新聞機構的立場和背景』？究竟《熱血時報》或果（嗰）位記者嘅立場和背景有什麼問題？點解唔講清楚？點解講得咁隱晦？最憎就係你呢啲咁嘅人。」「Tang Lai Kiu」就話佢畀人篤爆先補充：「不如判咗先講啦！」
有網民就覺得馮達浚唔提《熱血時報》記者，可能係因為熱狗成日狙擊「自己友」。「AL AY」揶揄佢：「×，熱狗就是原罪，泛民做十萬九千七樣野（嘢）出賣港人就『不分化』......香港搞到今日甘（咁）（多）泛粉......真係功不可沒，俾（畀）d（啲）掌聲自己。」
「奧迪斯」就覺得馮達浚先係謀殺第四權：「為何提及城大編委記者，卻不提及熱血時報記者馬啟聰同樣被加控暴動罪？記者間有分別嗎？所有媒體也是第四權的一部分嗎？若忽視部分媒體，用你的說話，這是參與謀殺還是保護第四權？希望你不要自我審查！」
不過，「Casaire Tsukiji」嘅留言先至最直指核心：任何媒體都無特權犯法。「即使是正規媒體都不會有任何『特權』，被捕都比照其他被捕者辦理......要拉都照拉。」 ■香港文匯報記者 黃書蘭