要團結成日內訌嘅「黃店」？搵個共同敵人就得啦。「人血龍門（龍門冰室）」老闆饅頭張（張俊傑）控告前員工楊朗誹謗一事引起軒然大波，除咗網民群起狙擊，多間「黃店」近日都聯合起嚟對抗饅頭張。其中同「人血龍門」最多牙齒印嗰堆「黃店」，噚日一齊發售嗰本揭露饅頭張黑歷史嘅「抗爭」文本《消失了的聖誕卡》，有網民仲發現楊朗早前經常幫襯「人血龍門」嘅死對頭「大渣哥茶記」，令人懷疑呢堆「黃店」為咗打沉「人血龍門」呢個生意勁敵，所以暗地搞場大龍鳳。聽落去好似天馬行空，但喺「黃絲」嘅世界就真係乜都有可能嘅。■香港文匯報記者 鄭治祖
呢件事最令「黃絲」不滿嘅有兩點，一就係楊朗係被律政司起訴暴動罪嘅「手足」；二就係饅頭張搵咗間「黃絲」覺得係「藍營」嘅律師樓。潛咗水幾日嘅饅頭張前晚就喺「人血龍門」facebook專頁回應，話佢對楊朗被起訴暴動一事亦「深感不公義」，但同佢告楊朗誹謗完全係兩件事喎，仲話佢搵嘅大律師王加豪，曾經喺梁振英告鍾劍華誹謗一案中，為鍾劍華抗辯。
轟張搵「藍」律師樓
唔少「黃絲」網民睇完都繼續炮轟饅頭張，但「MH Pang」就解釋，大律師必須經律師轉介聘用，反問如果饅頭張搵嘅江得源律師樓係「藍營」，點解仲會轉介一個「黃營」律師？佢仲狂寸楊朗唔止誹謗「人血龍門」，仲誹謗埋江得源律師樓係「藍營」??！
不過，「Cecelia wong」依然唔理：「張生點解成篇文都冇提過江得源律師樓？係咪心（身）有屎唔敢回應？」「Stephen Chow」就覺得饅頭張咁做都好合理：「如果我要告一個人，我會搵一個有把握嘅律師，定搵一個會企係（喺）被告果（嗰）方嘅律師？如果我告楊朗，我都未必會搵一個有機會同情『手足』嘅律師。」
「黃店」抽水唱衰張
日日想打沉饅頭張嗰堆「黃店」梗係唔會放過今次機會，其中「甜一刻」就聲稱佢哋有員工因為同饅頭張有錢銀問題，過檔之後講咗饅頭張好多衰嘢出嚟，又強調佢哋咁憎「人血龍門」絕對唔係想搞分化喎；另一「黃店」「新景園咖喱小廚」就話佢哋永遠企喺「手足」同「雞蛋」一方，大鬧饅頭張「人面獸心」、「衣冠禽獸」。
經常狙擊「人血龍門」嘅「Anita Wong」就話，饅頭張愈係唔想大家睇到楊朗踢爆佢衰嘢嗰本《消失了的聖誕卡》，佢哋就愈要廣傳，仲話如果大家想買呢本書，可以幫襯「水門泰式雞飯專門店」、「光榮冰室」、「Let's Jam」同「陸陸雞煲火鍋」呢啲「人血龍門」最憎嘅「黃店」喎。睇到呢度真係不得不佩服「黃店」嘅生意頭腦，喺打壓敵人、聲稱幫緊楊朗嘅同時，仲可以順手賣書，真係一箭三鵰！
攬炒區員湊熱鬧博曝光
除咗「黃店」，攬炒派區議員趙家賢亦嚟湊熱鬧，又話自己多次同協助「黃店」告急嘅楊朗聯絡，肯定對方係真「手足」喎，點知「Mimi Chan」就話：「多此一舉！你唔講我都知佢係『手足』啦，無啦啦又話自己同人有關係，博咩呢？」
「Anita Blue」則貼出一張楊朗幫襯「大渣哥茶記」嘅相：「（楊朗）去『渣哥』度商量點樣繼續喺網上面嘈，都唔去搵張生傾，知咩事啦！」「kacy Lee」就懷疑：「電視劇好多呢啲劇情，平時大家互搶手（生）意，見到有龍頭就眼紅人哋搵得錢多，夾埋一齊搵個卧底砌低佢，少個敵人之後先再慢慢爭」。「Mary Li」就話：「點都好，張俊傑係賤人就係事實，呢啲『黃店』都唔好得去邊。」