■「馬鞍山守護線」話吳定霖嘅宣傳品未經佢哋同意擅用佢哋嘅相。 fb截圖兄弟爬山，你跌低，佢咪踩多腳囉。傳統「飯民」近年想黐住「抗爭派」，但點知步步失策，搞到啲「抗爭派」更加避之不及。日前，「馬鞍山守護線」就專登出咗個澄清聲明，話民主黨吳定霖個宣傳品用咗自己嘅相，但佢哋冇同意喎，仲要用黑體字聲明佢哋「並非民主黨成員及與吳定霖區議員沒有任何政治聯繫」喎。
傳統「飯民」近排真係變咗過街老鼠。話說沙田區議員吳定霖被發現喺宣傳品印埋同區攬炒派區議員、「馬鞍山守護線」嘅麥潤培、鍾禮謙、鄭仲恒同埋許立燊落去，搞到班人鄭重其事咁出聲明要撇清關係。
「馬鞍山守護線」日前喺facebook發帖稱，近日於美林邨出現嘅唔少印有「山守線」成員嘅宣傳品，其實係屬於吳定霖嘅，「山守線」各成員事前並無同意可以展示樣貌或者姓名等，都冇同意佢利用「山守線」各議員名義喺美林邨位置張貼海報。
佢哋仲嚴正聲明自己「並非民主黨成員及與吳定霖區議員沒有任何政治聯繫，望能釋除公眾疑慮。」又話雖然「非建制派確實要團結一致，但同時亦應該互相尊重，才能達成和而不同」喎。
麥潤培轉發聲明時又要寸多句：「識還識......攞相係咪都要問左（咗）先？」佢仲話︰「我唔介意『被白鴿』！只介意『被吳定霖』。」網民「Jeff Lai」都幫口鬧：「正正經經做嘢唔得嘅，係要走精面......」
吳定霖冇交代仲扮受害
班人踩到吳定霖入深坑，吳定霖之後就喺facebook冇頭冇尾咁發咗一篇感慨：「政治路途險惡，正直的人難以猜測小人心機......經一事，長一智，只好笑看風雲！」講到好似好有故事，但又唔講發生咩事，唔通驚咗班「抗爭派」？ ■香港文匯報記者 文根茂