●「N.T.監察聯盟」揶揄公民黨變成「公廁黨」。 fb截圖近日公民黨嘅退黨名單又添一人，佢就係做咗接近廿年區議員嘅黃家華。相比其他早前高調宣布退黨嘅公民黨成員，黃家華可謂走得靜悄悄，直至近日俾傳媒查詢時先承認自己一早遞咗退黨信，而且上月已經生效。至於退黨原因？佢就聲稱冇咩特別，想退就退喎。有網民就揶揄公民黨同公廁一樣可以自出自入，俾人攞完光環後就頭也不回咁講ByeBye。俗語話「爛船都有三斤釘」，??家連公民黨嘅老將都走埋，睇嚟就快夠鐘沉船了。
自2004年起擔任荃灣梨木樹西選區區議員至今嘅黃家華，早前回覆傳媒查詢時承認上月已經退黨，話自己一直專注地區工作，咁多年嚟只出戰過一次立法會選舉，仲要排喺名單較後位置，冇諗過喺政治生涯上「更上一層樓」，所以「想退黨就退黨」喎。
翻查資料，公民黨去年中開始爆發退黨潮，喺立法會前議員陳淑莊宣布退黨及退出政壇後，楊岳橋、譚文豪、郭家麒等其餘立法會前議員亦相繼退黨，退出該黨嘅區議員亦唔少，包括伍月蘭、陳諾恒、冼豪輝、譚家浚、俞竣晞、鄭達鴻、李予信同鄭文杰，而去年11月被取消議員資格嘅郭榮鏗亦已宣布退出政壇，雖然佢至今冇公開宣布退黨，但據悉佢已經幾個月冇理過該黨嘅內部事務。不過，呢班公民黨前成員早前都有透過fb或者傳媒高調宣布退黨或者退出政壇，今次黃家華退咗黨一排後俾人問到先認，真係夠晒低調。
fb專頁「BlueBase」轉發黃家華退黨嘅報道，揶揄黃家華可能「不想人生更精彩」而「退黨保平安」，認為對黃家華嚟講「最緊要有糧支」。fb專頁「N.T.監察聯盟」亦轉載報道，揶揄公民黨已經變成「公廁黨」。網民「Yiu Chung Yeung」就形容黃家華係「投機主義者」。「Winnie Chan」就見怪不怪：「牆邊草！多的是！」住梨木樹嘅「Kevin Lee」就批評黃家華：「晌（響）梨木樹一年都浦（蒲）唔到兩次頭......哩（呢）兩個×街，未有暴動前晌（響）社區都仲叫有D(啲)貢獻，成日晌（響）社區度派吓物資俾（畀）公公婆婆同D(啲)弱勢社群，連任後已經即時黃蟲現形，唔再做社區工作。」 ●香港文匯報記者 雨航