|
■：記者問；戴耀廷答
問：戴教授，請問何時會交代「佔中」數目？
戴：我都答唔到具體（日期）......只能夠我哋會盡快。
問：有無預計過最快幾時公佈？
戴：我諗......月底、下個月頭啦，但這是我純粹希望，未可肯定講到，希望佢哋（核數師）盡快（完成報告）。整個「佔中」的捐款、（金錢）應用，都由我哋核數師負責。整個核數報告講唔到實幾時（有），但我哋已經交晒啲資料，做到個數畀核數師睇。咁就......佢都話需要啲時間睇，我哋都係話盡快做啦，因為都好多人關心啦。
咁因為成個「佔中」運動唔係喺我哋自首就即時完結咗，雖然我哋進入咗比較低調嘅狀態，咁都係去到「6．18」立法會否決咗個（政改）方案，咁我哋先係完成晒成個「佔中」嗰個計劃行動。
因為我哋見到最後嗰點就係立法會否決咗（政改方案）啦，成個政改嘅過程過咗啦，所以我哋先至係叫做所謂「埋數」啦。因為仲有變數㗎嘛，如果立法會唔否決，假設唔知點樣有個談判出嚟，跟住有個方案出嚟，我哋仲要搞個第二次全民投票㗎嘛，所以我哋仲係KEEP住啲嘢，咁就直至到知道啦，唔會再有任何變數、再有任何進一步嘅工作啦，咁所以我哋咪喺「6．18」之後，先至可以講係正式嘅「埋數」囉。
咁所以依家講緊喺好短嘅時間，我哋做咗，好快咁就交咗畀核數師，等核數師最後做返個報告，咁我哋都希望可以盡快啦。
問：咁依家有冇統計到（「佔中」）用咗幾多錢？
戴：咁我就唔係管數嘅，所以有啲嘢，我嘅印象就唔係好準確。我諗，都係等個報告出嚟先啦。
問：戴教授，咁你頭先話份審計報告冇講到你干犯咗邊條條例，咁係咪即係話你覺得用港大嚟收受捐款係冇問題？
戴：其實你睇返個審計報告，係完全無質疑呢個捐款嘅用途㗎，即係所有捐款係完全符合大學嘅規定，包括咗係民間全民投票，同埋港大法律學院用嗰啲捐款去舉辦咗個學術會議，同埋做一啲有關法治教育嘅工作，呢啲係完全無被審計報告提出話呢啲捐款嘅用途係出問題。
其實所有嘅嘢，係涉及一啲好雞毛蒜皮嘅、程序上嘅一啲安排，咁佢就話係唔符合期望。呢啲係講緊陳教授（陳文敏）有啲嘢冇話畀佢秘書知，咁其實都係有話到，只不過唔係即時話畀佢秘書知，咁就話係唔符合期望。咁個期望係邊個定呢？點樣定呢？點解係咁定呢？似乎個報告都係完全講唔清楚。
■整理：記者 鄭治祖
|
