■日本女子樂隊Silent Siren香港文匯報訊 日本女子樂隊Silent Siren昨日在港舉行粉絲見面會，吸引過百人捧場，4名成員為吉田菫、梅村妃奈子、山內Aina及黑坂優香子，甫出場即識做各自以廣東話自我介紹。活動上，4女透露來港呢幾日，去咗女人街Shopping買手信，又食了乾炒牛河同豉油王炒麵等地道美食，大讚好味。又話在香港一定要買萬金油，惹來全場大笑。
適逢今日是父親節，大會安排陳奕迅、甄子丹、謝霆鋒同陳豪的相，畀4位成員選出心水好爸爸，主音吉田菫就揀咗霆鋒，搞笑話因為佢好靚仔，而鼓手梅村妃奈子就揀陳奕迅，仲話聽過《富士山下》覺得佢唱得好好聽，而且感覺好溫柔，最後貝斯手山內Aina就揀甄子丹，覺得佢眼神好強勁，感覺可以保護到自己，仲即時擺出功夫甫士搞氣氛。電子琴手黑坂優香子揀咗陳豪，話因為佢有三個小朋友，覺得應該係好爸爸，又大讚陳豪感覺係運動型，所以應該會陪小朋友打波。
提到父親節禮物，吉田菫搞笑爆爸爸係光頭佬，所以想送帽畀佢笠住個頭。