■林兆彬以另一方法踢爆《熱時》涉嫌篤數。fb截圖「熱狗」網媒《熱血時報》涉嫌篤數的風波越鬧越大。非「熱狗」的激進派中人，以Livestream顯示的直播數字，質疑「熱狗」前首領「狗達」（黃洋達）使出「十倍界王拳」，將收看/收聽人數誇大十倍甚至二十倍。「熱狗」則反擊話人「唔識IT講IT」，網上一片熱鬧。不過，《熱時》近日將顯示觀看數字的頁面隱藏；一直對「仇人」定會窮追猛打的《熱時》節目主持人更突然以「做自己嘢」為由，不再評論。由於風格太不「熱狗」，有人質疑「狗達」衰咗，故斬腳趾避沙蟲。另有人認為應讓《熱時》的廣告商得知此事，甚至提出要向商業罪案調查科舉報。嗱，唔好得個講字呀！■香港文匯報記者 羅旦
自從「熱城」以「獨派」一貫以來煽動仇恨的思想四出「清算」，搞到「獨派」大分裂，七國咁亂，更向原先「奉若神明」的「狗主」黃毓民開火，非「熱狗」和「狗主」粉絲則不斷反擊，搞到網上花生不斷。
同屬「獨派」的「無敵神駒」仇思達，以Livestream顯示的觀看數字，質疑《熱時》直播節目時的所謂「在線人數」報大數。「熱狗」當然群起而攻之，更引用其他「數據」反駁。
改隱藏Livestream在線人數
身為「獨派」口中嘅「港豬」，真係對IT嘅嘢識條鐵咩！不過，Livestream近日突然不再顯示《熱時》節目的觀看數字，而《熱時》多名節目主持人均以「專心做返自己嘢」為由，稱不會再就此事講嘢，就係人都覺得有鬼怪。
古怪行徑被指變相認篤數
仇思達就發帖道：「《熱血時報》被斷正在網台篤數造假，無計可施之下，索性將Livestream的直播頁面隱藏，逃避群眾追查。這就是標榜『正直』的『熱狗』之所作所為，被人踢爆造假之後，顧左右而言他，故意轉移視線，妄圖淡化事件。『熱血公民』及其黨媒《熱血時報》至今不敢正面回應，卻一而再試圖瞞天過海，繼續用篤數打飛機，可謂自欺欺人。」
網民「Wing Hon Yeung」估計是「熱血個it狗俾（畀）錢升級咗livestream ac（賬號） ，可以hide（隱藏）埋live event（現場活動）」。
「Zilo Mok」則稱：「已經無『熱狗』會再講咩技術問題，今（前）晚仲昇（升）級隱藏埋Livestream數目，等同用行動承認係篤數，只係搵班打手不斷淡化件事，講到篤數好小兒科，唔駛（使）大驚小怪，而（??）家唯一一招，就係將所有質疑者屈成係『人社本民青』打手，然後等件事丟淡。」
「Chloe Alison」就揶揄道，「有人話被人踢爆篤數影響力唔大，如果影響力大，同廣告商之間就會構成詐騙罪，話『黑警』一直致力於打擊該組織，會無發現到？同埋一直都未有遭受起訴。哦，咁既然被踢爆篤數影響力不大，咁而（??）家連Livestream既（嘅）直播頁面都隱藏埋，代表咩呢？」
網民教睇真實數字寸「狗達」
有網民更上載另一網頁（https://pk-times-viewer-counter.000webhostapp.com），可以繼續顯示《熱時》節目的觀看數字，更以「狗達」經常掛在嘴邊的所謂「人最緊要正直」來命名寸之。
報稱為立法會議員助理的前學聯副秘書長林兆彬也繼續狙擊，更教路稱：「雖然《熱血時報》進一步隱藏了livestream在線人數，但原來仲有另一個方法睇到livestream在線人數！首先去《熱時》livestream（https://goo.gl/HqGb8Y），然後睇網頁原始碼，搜尋『viewer_count』就搵到真實人數！再睇下《熱時》網站的在線人數，發現兩者相差超過20倍？！」
「熱狗」咬人咬得咁過癮，如今想停戰呀？好難嘞！乖乖地搞多幾場大龍鳳，等班「港豬」食花生食到熱氣罷啦！