■「辣椒文集」發帖質疑袁海文。網上截圖本來「伸張正義」係冇錯嘅，但係身為政黨，係咪應該謹慎啲呢？係人都知有意參加九龍西補選的民主黨深水埗區議員袁海文，近日開記者會，話有單身女子投訴在社交網站被陌生男子搭訕後，被帶到美容中心買過萬元療程喎，更形容之為「美男計」。不過，袁海文不但搵埋苦主開記者會，更將該批「陌生男子」起底並在fb廣傳，既惹來好事網民恥笑苦主「咁都中招」，更有人不滿民主黨「未審先判」，「隨時俾人告誹謗囉。」
袁海文此前聯同十多名苦主舉行記者會，稱他們收到陌生男子在交友平台上主動搭訕，首次與對方見面就被帶到一間美容中心，在被游說後購買了數萬元的療程，又稱該黨過去半年收到最少40宗同類投訴，均涉及同一間美容公司，每人付了數千至25萬元，總金額超過200萬元，有人已向海關投訴。
其後，袁更將苦主提供的「陌生男子」的照片及名字等上載了民主黨及自己的fb專頁，形容此為「美男計」，仲賣贊助以增加曝光率。
不過，此帖一出，似乎帶來不少反效果喎，就係令一眾女苦主被網民瘋狂恥笑。「楠澄津」稱：「美男？我係婆婆級都嘔！」「Lok Rex」揶揄道：「啲港女驗眼好過美容啦！」「Jeff Lai Ka Ho」也稱：「甘（咁）既（嘅）樣都中計，好難幫你。」
「Siu Hei Yeung」則稱，「點解你們眼界如此低落呢？這樣子都叫做美男，的確是自招麻煩啦！」「Wah Chu」也揶揄：「呢班女人真係好肚餓！」
網民：未審先判 可告誹謗
「Lee Gary」更稱：「d（啲）女嘅樣都唔見得好好。Btw，俾人氹2句就俾（畀）錢只能怪自己on ×。」「Tungsing Wang」也聲言：「睇仔質素，巳（已）知呢班中招女的質素，唔通會呃到李嘉欣，吳千語咩？」「Christy Po」則講句公道話：「其實未必靚仔先呃到女，D（啲）女就係覺得佢平凡，感覺健康正面，先容易騙取好感！」
坦白講，如果有人真係呃人，咁公佈佢哋個樣同埋姓名都好應該吖，特別係無權無勢嘅小市民。不過，民主黨係反對派「第一政黨」喎，點可以未審先判？一直親反對派的fb專頁「辣椒文集」就上載了袁海文的截圖，質疑道：「班美容騙徒係賤格係×街，但係你堂堂一個民主派大黨，不問證據，不待法官審判，將網上找來的起底紀錄整出來，出埋樣同名，咁樣去話人，隨時可以告你誹謗囉。」
為選票 呃2000幾like
該專頁更質疑民主黨以至袁海文此舉，是為了「青症雙邪」一旦被終極DQ後所舉行的補選有關：「（袁）為咗選票，為咗呃like，做埋啲三登同熱血時報行為，重（仲）要用黨個official page狂買 boost post，你核唔核突啲呀？而到今時今日，碌到2000幾like,，竟然無人覺得呢件事係有問題？民主派的質素就係咁？」
網民「Jacky Lee」就挑機稱：「如果係其他苦主post呢？......我明理應按正常途徑處理，但困境係的確又有好多情境會係法律難以處理，......我都討厭好多時乜都起底，沒完沒了，太超過（過分），對起底者不公；但也要想想點解D（啲）人寧願先公審去洩憤/吸票/報復etc......」「辣椒文集」則反駁道：「而（𠵱）家係討論緊大黨係咪應該用自己牌頭做啲咁嘅嘢，而唔係起底呢件事啱唔啱。」 ■香港文匯報記者 羅旦