■莊偉忠的言論備受批評。 網上截圖高鐵「一地兩檢」喺社會引起熱議，但如果言論只得質疑，好容易被網民話返轉頭。康宏金融集團行政總裁莊偉忠前晚喺facebook不點名講高鐵，聲稱「丁點兒好處，使唔使過千億咁那昂貴？值唔值法治咁大犧牲？」有網民直言︰「丁點兒好處都講得出，目光短視之極。」不過，莊偉忠呢篇批評帖文都仲係俾《蘋果日報》引用，雖然佢知道後就擺咗個滴汗公仔，而康宏金融集團方面嘅公關昨日接受香港文匯報查詢時就話，莊偉忠喺個人fb講嘅嘢只係佢本人立場，並不代表集團。
莊偉忠前日喺fb出文，一開頭話「霸王硬上弓，辭窮理屈，橫蠻白癡反智，直頭當人係傻㗎」，完全唔知佢講乜，到最後嗰句「問題係，丁點兒好處，使唔使過千億咁那昂貴？值唔值法治咁大犧牲？」，先令人聯想到可能同高鐵有關。
有人疑似踩高鐵，《蘋果》好快就引用咗，仲大大隻字話「康宏金融集團行政總裁莊偉忠爆seed」添，但當有人同莊偉忠講「你嘅post文上咗生果報呀」，佢又擺咗個滴汗公仔，似乎唔想太高調喎。香港文匯報記者就問過康宏金融集團㗎啦，該集團方面嘅公關話莊偉忠喺個人fb講嘅嘢只係佢本人立場，並不代表集團，而集團亦都唔會去干預佢個人fb嘅言論。
至於網民點睇？一直反高鐵嘅當然多謝佢講出心聲，但更多網民就批評佢短視。「Luxius Yeung」就反問︰「法治有幾大犧牲？點大法？......d（啲）議員一直×up（噏）嘅問題係『中國（內地）人員香港境內執法』，但×你老母人地（哋）執法範圍只係關檢，又點干預香港法治？」 ■香港文匯報記者 甘瑜
