■薛家燕表示被監製的熱誠打動，自己睇過劇本亦十分鍾意，最終答應接拍。香港文匯報訊 新劇《燦爛的外母》將於今晚8點半播出，對於兩年無拍劇的薛家燕早前揚言自己其實好怕夏天拍劇，但監製歐耀興話這個故事劇情主打溫馨好笑，更多次同家燕姐講女主角係為佢量身訂做，非佢莫屬，家燕姐被監製的熱誠打動，自己睇過劇本亦十分鍾意，最終答應接拍。
家燕姐表示雖然呢套劇係搞笑劇，但拍攝過程都好辛苦，一來因為熱天，又加上日夜組趕戲，兩年無拍劇難免有壓力，所以今次家燕姐非常注重拍攝出來的效果，好多事都會親力親為，對自己的要求亦更加高，家燕姐會主動同編劇研究劇本，仲要度情節同改對白。拍攝期間亦會同導演商量拍攝的角度，盡量令套劇的畫面拍到最佳效果。家燕姐最欣賞就是今次一起拍攝的好拍檔，如林嘉華、黎諾懿、湯洛雯、姚子羚、張頴康等等，讚佢哋各個都好有熱誠，所以好開心可以參與《燦爛的外母》！由於大家都很齊心，所以整個團隊都好認真同團結，最後監製多番要求重拍十多場戲時，大家都好齊心務求做到最好，努力配合完成。
拍劇拍到中暑感冒
拍完劇之後家燕姐更接到錄製《燦爛的外母》主題曲的任務，但因為起初未知拍攝完成後一個月就會立即播出，所以錄製的時間非常緊逼，加上拍劇拍到中暑，又患重感冒，錄完之後覺得唔太滿意，因此家燕姐休息兩日後再去錄過，佢都好多謝公司高層Herman(何哲圖)親自監製今次錄音，坐足4個幾鐘 ，雖然好大壓力，第二次錄製結果珍姐(無綫戲劇製作總監曾勵珍)都好滿意。家燕姐更表示今次首歌同劇裡面佢嘅性格好似，要一連串講好多嘢，而且比較高音，字又好密，希望大家會喜歡呢個全新感覺。
拍完一個月即出街
大家辛苦努力的成果，沒有白費！《燦爛的外母》拍完第一集之後，監製立即睇完，非常滿意，不知是否這原因，所以劇集拍畢剛一個月後，就可以播出街，連家燕姐都表示好緊張同興奮，大家記得要收睇，否則就要等一年後才可再睇到家燕姐的劇了！