林 作
惡名遠播嘅連環殺人犯查爾斯．曼森（Charles Manson）幾日前終於離世，終年83歲。記得我早前其中一篇文章曾經強烈推薦的美劇《Mindhunter》？此劇由真人真事改編，講述上世紀70年代左右美國FBI為了研究連環罪犯嘅心理，特地去唔同監獄訪問各個連環殺人犯，從而有效預防以及破解這類罪案。其中曼森嘅大名就係劇中曾經多次被提及。由於他作案手法極度兇殘，行為瘋狂暴戾，甚至沒有親自殺人卻誘使他嘅信徒奪去多條生命，所以曼森一直被當作一個「傳奇」嘅存在。
同其他連環殺人犯一樣，曼森嘅童年過得十分艱苦，喺破碎家庭長大，被母親多次棄養，少年時期已不斷作奸犯科，亦頻繁出入監獄。根據原著中FBI探員提出嘅理論，殺人犯通常係童年已經會展示暴力傾向，如：虐待小動物、嚴重欺凌等等，所以出現呢類嘅徵象的小朋友需要特別留意。
呢個理論令我聯想到最近喺屯門一間小學發生嘅欺凌事件，一名小一生遭同學掌摑、插眼及以鉛筆插耳，導致擦膠頭遺留耳道需做手術開刀取出。學校為咗保存聲譽而決定將事件低調處理，若非小童嘅媽媽將事件鬧大，恐怕呢件事會不了了之。學校當然解釋事件可能係因為推撞而不慎引起，但這樣一連串傷勢是「巧合」，你會否相信？
身為教育工作者，理應將學生的成長及安危放在第一位。這種只顧及自身利益的人，我敢直說，他們不配為人師表。這樣會對受害的小童不公，造成嚴重心理陰影，而欺凌他人的孩子亦可能會因為沒有什麼後果而變本加厲。
當然，我唔係話佢哋未來會成為什麼犯罪者，但喺𠵱家佢哋嘅行為喺明顯過分情況之下，即使無法刑事追究，採取適當嘅輔導及觀察可以話係必須的。希望教育局局長真的可以如他所說，對呢類事件「零容忍」，矯正孩子的行為以及懲處蓄意隱瞞事件的始作俑者。