梁振輝 香港資深出版人
父：Mami，你發唔發覺婷婷呢排我哋講嚫乜，佢都「頂」番轉頭；仲有發起「老脾1」上嚟，真係「唔係人咁品2」！
母：Daddy，青春期啲女仔係好情緒化嘅，佢想點，真係估佢唔到！不過，我嗰陣咪又係咁！
女（甫進門）：又講我乜呀，我一唔喺度就講我，好心你哋有啲口德好冇，因住有報應呀！
父：婷婷，唔係咁同我哋講嘢吖嘛？
母：喂，講番轉頭，搞乜鬼去到咁夜？同邊啲人去？女仔之家，你唔驚我哋擔心㗎？
女：好夜咩？亞婆周時都同我講，話你「做女3」嗰陣，成日去到「三更二鼓」（半夜），咁點計先？
母：你就去wet（交際），我去同學屋企溫書咋！
女：去「溝仔」（交男友）咋卦！係亞婆先至信你啫，畀我，唔攞把鎖塔（鎖）住你就「跟你姓4」！
母：Daddy，你睇下佢吖，句句「頂心頂肺」！
父：Mami，你唔只生咗碌「頂心杉」，仲着咗對「頂趾鞋」㖭！真係「前世」（報應）囉！
女：講開就啱嚹，我今年生日你哋送嗰對波鞋唔慌唔「頂趾」嘞！舊年我着6號，而家係發育時期，你哋用下「腦5」都知今年隻腳會大咗喇！
父：婷婷，今時今日，咁嘅態度係唔得㗎！
女：嘩嘩嘩，劉德華！呢句都out（過時）喇！
母：你仲係咁，啲男人見到你都走夾唔唞喇！
女：你同我定，我有手有腳，唔使靠啲臭男人至生存到嘅！唔似得你咁，嫁咗要靠老豆養你！
父：唔好咁口響，女人始終都要有番個歸宿嘅！
母：婷婷呀，你老豆真係講得你冇錯㗎，好心你收斂下啦，你再係咁真係冇人頂得你順㗎嚹！
女：「頂唔順」就舉手，講聲bye就得嘞！
父：衰女，好灑脫噃，真係「冇你收6」！
基本上，對白中所提到的「頂」均帶同一含義--「唔理三七廿一」（有理無理），「駁咀駁舌」（反駁）、「窒頭窒勢7」（頂撞）。
廣東人多用「杉木」做「柱」。試想，人被「一碌杉」（一根柱）頂住心口，會有什麼感覺呢？心（裡）當然不舒服咯。有人便以「頂心杉」去形容那些愛「頂撞」長輩的人，尤指子女「頂撞」父母，其書面語是「眼中釘」，眼中的釘子，拔之而後快；比喻所痛恨的人；亦作「眼中刺」。
有了「頂心杉」，有人便叫「頂撞」這種行為做「頂心」。「心」、「肺」乃人體重要器官，「頂肺」猶如「頂心」，就有「頂心頂肺」的講法。
與「頂心頂肺」意義和結構雷同的有：
腰心腰肺/要心要肺/夭心夭肺
近年有兩首歌曲，《要心要肺》和《夭心夭肺》，人們因而認定「要」與「夭」當中必有個是本字。本字的判定，非從其流通程度，而是從其意義層面。「要命」用以形容程度非常嚴重。「心」、「肺」好比「命」，那長輩被後輩頂撞得「要命」就相當於「要心」、「要肺」或「要心要肺」了。習慣上，「要」讀時變調成「腰」。也有人說「要膶」，多人誤以為是「腰膶」（豬腰豬膶），因而百思不得其解。以下是其演變過程：
心→肝（同屬五臟）→音「乾」→廣東人忌諱而作「濕」→濕潤→潤→「膶」（粵方言用字），讀作「潤6-2」
廣東人有句：
不賢妻，不孝子，頂趾鞋，無法治。
家有不賢妻、生有不孝子，就好比一雙不合穿的鞋子一樣（頂着腳趾），無法治理（構成嚴重問題）。「頂趾鞋」指經常惹丈夫生氣的潑辣妻子，以及經常惹父母生氣的子女。
綜合而言，「頂心杉」和「頂趾鞋」的特色如下：自以為是；沒句好說話；語帶諷刺/說風涼話；潑冷水；「包頂頸8」/回嘴/抬槓/辯駁/辨駁；唱反調/對着幹。總之，被形容為「頂心杉」和「頂趾鞋」的人乃不知情識趣，惹人討厭。
在推動一些重物向上時，有人或許問：「能『挺上去』嗎？」。對於那些辦不到的或預計有難度的，一般會說：「不行，『挺不上（去）』！」有人以「挺不上」借喻支撐不了。「挺」與「頂」，基本上是互通的；「上」的讀音「soeng5」與「順」的讀音「seon6」相近。可能是這樣，廣東人就有「頂唔順」這個講法。以「順」作「上」，順理成章，皆因「挺不上」含「不暢『順』」之意。
時下年輕人，多目無尊長，「一口百二句9」（比「一言九『頂』」更甚），一般以能駁斥父母為榮。其實，弄成這個局面，雙方均有責任。為此，為人父母者要以開明的態度去對待孩子的意見，遇有分歧，雙方須平心靜氣去討論，而非以「泰山壓頂」的方式硬要孩子接受自己的想法；為人子女者切忌恃寵生嬌，須耐心聆聽父母的期望，不太合乎心意但卻有理的應盡量依從，畢竟父母閱歷較豐，本意定是好的。
_______________________
1、「老脾」指脾氣，「脾」讀「脾4-2」。
2、「唔係人咁品」指某人的行為非理性。
3、「做女」指未嫁。「女」讀「neoi5」，而非「leoi5/呂」（懶音）。
4、中國人重視列祖列宗，不輕易更改姓氏，改了就是恥辱，所以如不夠肯定是不會這麼說的。
5、「腦」讀「nou5」，而非「lou/老」（懶音）。
6、「冇你收」就是沒能「『收』服」你。
7、指用言語去「『窒』礙」他人的勢頭。
8、「包頂頸」是「瓦封領」的歇底。「瓦封領」是旗袍的一款領，領身畢挺，穿時頂着脖子（頂頸），有如瓦片封頸，因而得名。
9、「一口百二句」指不斷回嘴，此語幾近失傳。
【專欄簡體版】https://leoleung2016.wordpress.com/