■仇思達在fb以「突發消息」為題做直播，不點名鬧爆張秀賢。 仇思達fb截圖一有選舉，反對派嗰邊就會大派花生，真係食極都食唔晒！自稱「本土派」嘅前學聯常委張秀賢，早前宣佈參與反對派舉辦的新東補選「初選」，聲稱自己已得到「青年新政」、「本民前」及社民連等激進派嘅認可喎。「無敵神駒」仇思達日前就唔開名踢爆，自己聯絡過嗰啲組織人物，話根本冇人話支持佢。佢仲質疑張秀賢嘅動機，質疑佢明知「本土派」支持度唔夠傳統反對派高嘅時候，仲以「本土派」身份去參選，係將「本土派」「自我閹割」，將傳統反對派嘅「小圈子選舉」正當化喎。佢仲話自己今次唔開張秀賢名，係畀機會佢「好好反省」。
仇思達前晚在facebook以「突發消息！」為題做直播，不點名鬧爆張秀賢一方面聲稱自己是「本土派」，但又要去參與傳統反對派舉辦的新東補選「初選」，「你既然自稱『本土派』，但又參加『泛民』搞的『小圈子選舉』。不嬲『本土派』嘅支持度都唔夠『泛民』高㗎啦，你參加嚟做咩呢？選舉主任都未曾DQ你，你就走去『自我閹割』、自行剝奪被選舉權，你係咪將『泛民』搞嘅『小圈子選舉』正當化、合理化咗？」
稱激進派認可疑撻流朵
就有政界人士話，張秀賢向地區人士聲稱自己已經攞到「青年新政」、「本民前」及社民連的認可，以爭取地區「樁腳」支持。仇思達對此非常質疑，並稱曾聯絡那些組織人物，他們均一一否認，「你周圍同人講邊個支持你，搞到好似群星拱照咁，係咪真係有咁嘅一回事呀大佬？事實上有啲人唔滿意咁嘅行為，有就有、冇就冇，你唔好亂用人哋個名嚟撻哚（朵）。」
他更翻張秀賢舊賬，話佢過去一直都在不同系統裡「撈唔掂」，「要講你就大把嘢講啦，由你喺邊幾個系統出身，撈完一個系統又撈唔掂，又撈去另一個系統，變咗最尾就去咗『本土派』」，「一個人如果走到一步，你啲朋友、戰友都唔撐你嘅，咁你係咩人嚟嘅？大家都可以諗下（吓），你喺唔同系統都撈過，但嗰啲系統都冇走出嚟話撐你。」
仇思達最後稱：「我唔開你名就唔代表我驚×你，而係畀緊機會你，呢樣嘢係要搞清楚」，期望佢可以好好反省自己，唔好再做呢啲行為，「真係畀哂（晒）機會你，你唔好再亂講嘢。」
聽對家直播踢爆無回應
喺直播留言中，有人發現張秀賢都有聽，但張秀賢喺facebook到就冇回應過「假支持」嘅問題，反而佢個人fb上就晾住一篇「Joel Lau」寫嘅文，呢個人就話「不在香港的那位賢弟（「本民前」黃台仰）話「接受」張秀賢參加補選，又話張秀賢有同「被DQ那位（『青症』梁頌恆溝通）」，所以佢「估計張秀賢應該已經得到上述兩人的『不反對參選』的『口頭承諾』」喎。其實spin（扭）咗咁耐，人哋到底有冇話支持啫？ ■香港文匯報記者 鄭治祖