■袁嘉蔚(左)及周庭(右)。 網上截圖個個都講「初選」，唔通個個區都有「初選」咩？事實上，港島區真係冇「初選」，已經大家讓晒路畀「中箭」（「香港眾志」）個周庭去出選啦。如果大家記性好啲，可能都仲會記得早前傳過羅冠聰（羅三七）女友袁嘉蔚有機會出選，結果就有個「安慰獎」做咗「中箭」副主席，等佢同主席羅冠聰夫妻檔囉。袁嘉蔚做咗副主席之後，噚日就喺「中箭」個facebook度大談「女性參政」，狂呻大家成日話佢係羅冠聰女友，冇人記得佢叫咩名，但似乎都冇乜人理，反而有網民話︰「講真，如果袁嘉蔚參選就會落敗，沒有政績沒有踏實的外表只有是羅冠聰女友身份怎能說服港島選民？年輕人轉頭分手比比皆是，今天她能作（做）副主席已經是太快了。」
或周庭參選 袁做副主席
「中箭」羅冠聰同黃之鋒都官司纏身，隨時又要再坐監；攝石黎（黎汶洛）又消咗磁咁無影無蹤；林淳軒又因為「黨內財政處理問題」執包袱，「中箭」真係冇乜人剩，唯有夾硬嚟個「孖妹組合」，前日宣佈周庭「積極考慮」參加港島補選，袁嘉蔚就做副主席咁話。
消息一出，唔少人都報以冷笑。「Dante Ma」就話︰「『眾志』政治只係玩家家酒而已。」「李明明」就話「中箭」「用人唯親」，同主席關係親密就可以「上位」，如果調轉係建制派嘅議員實會俾人話。
仲有好多針對周庭出選嘅批評。「Anthony Tsang」就問︰「我唔係你既（嘅）敵人，但想問一句，一個受唔住壓力而退出『學民（思潮）』既（嘅）人有咩資格講承擔，要人支持？」
「Ivaline Poon」就幫拖話︰「曾經受不住壓力，但人可以成長。」「Truman Chan」進一步諷刺話︰「『佔領』時受不住壓力，選舉時就成長，咁×著（着）數？」
「Dante Ma」亦追擊表示︰「這一席預左（咗）送畀建制了，慘過（民協）馮檢基出戰西九。」佢仲話︰「老唔係罪，係馮檢基得唔到大眾支持又堅持出選才是罪。周庭呢？佢連初選都唔需要，港島區會有幾多人投佢票先？」 ■香港文匯報記者 甘瑜