■陳國強的帖子。 網上截圖曾幾何時反對派話「真普選，冇篩選」，但𠵱家佢哋又自己搞「初選」，唔係篩選都唔知係乜。而呢種篩選操作可以好簡單，扮睇你唔到就得。話說撐「獨」區議員陳國強前日大大聲宣佈話想參加新界東補選，仲講埋想玩「初選」，仲有傳媒報道㗎，但負責搞「初選」嘅「民主動力」就話冇人聯絡佢哋，所以已經出咗名單嘞。咁啱得啱蹺，陳國強都堅稱自己唔知要報名，批評佢哋「偽初選」喎。明明都係反對派，雙方都「你睇我唔到」，但雙方嘅「食相」唔少人都睇得清清楚楚喎，有心定無意，大家話呢？
宣佈直接參選新東補選
陳國強前日喺「民主動力」個「初選」截止報名前宣佈話參選，仲特登加句「煩請廣傳，免最後被罵不參加『初選』！」不過噚日人哋公佈嘅「初選名單」都係冇預佢，陳國強隨即就宣佈會直接參選新東補選咁話。
佢仲批評人哋係「偽民主初選」、「初選變成真篩選」，質疑到底有幾多人知要點樣報名、報名表喺邊、報名費幾多，「以上三個問題，我相信好多積極在前線真正追求自由和民主的香港人，都答不出！『泛民』的『偽初選』，憑乜代表香港民主派？」
唔少陳國強支持者一直都睇唔過眼傳統反對派，「Kin Chan」就揶揄「民主動力」係「神秘民主組織」，「Fred Lai」亦話︰「攞（擺）到明唔侵（摻）『飯（泛）民』圍內以外嘅人玩啦！」
「Kwokchun Cheng」就驚訝「初選」報名費咁貴，「下？報名費要交七萬？正式選舉都係交五萬保證金咋喎，用錢嚟篩選小黨小派呀？」陳國強就唱雙簧咁話︰「立法會五萬是保證金可以退，但初選這七萬，好似冇得退的。」
不過，呢個世界好「公平」嘅，你唔知人哋「初選」點報名，人哋都話唔知你想報名㗎。「民主動力」趙家賢就話，佢哋一直有透過「唔同渠道」了解邊個想參選，但冇人聯絡過佢哋。
支持「民主動力」嘅人當然即刻鬧爆陳國強係鬼啦。「Marble Wong」就揶揄陳國強︰「嘜（乜）都吾（唔）知由（又）吾（唔）睇新聞點選呀？」「Betty Chiu」亦話︰「慳d（啲）啦，界（鎅）一張票收幾多錢？」
激進反對派的「進步教師聯盟」韓連山亦喺陳國強度留言挑機：「尊重你的參選權。但請三思：一、必落選；二、必分薄票源；三、必令港人失望、甚至唾駡！」不過，「Mk Rac」就質問︰「點解老師會有這種逢反建制的就要加入『泛民』小圈子協調才是大道理的想法？真正的民主選舉係每人也有參選與選舉自由。並非由特定的人一班人先進行篩選間接地操控選舉。」
所以話呢，「民主派」真係好民主㗎。其實無論陳國強定「民主動力」，大家嘅鴕鳥程度都差唔多啫，呢鋪大家打和啦。 ■香港文匯報記者 鄭治祖