反對派喺議事規則修訂一事上衰咗之後，就互相指責，最新一輪嘅做法就係去怪罪明明講咗自己係「中立」、唔係「泛民」嘅醫學界立法會議員陳沛然。話說陳沛然喺議事規則修訂上，投咗嗰唯一一票嘅棄權票，雖然對結果冇影響，但都俾反對派嘅「杏林覺醒」、「真普選醫生聯盟」抽秤，前晚發聲明話佢唔「擇善固執」，要佢公開交代喎。陳沛然噚日就發聲明交代，直言好多人都支持議事規則修訂，所以自己先揀棄權。原本都係想扮睇唔到民意啫，結果人哋真係交代講出事實，反對派咪仲難堪。
竟被要求盡快交代理據
「杏林覺醒」同「真普選醫生聯盟」前日針對陳沛然嗰票棄權發聲明，話對佢咁做「極為失望」，話佢就算唔係關鍵一票、唔可以改寫結局，都應該「憑着良心和專業精神，為香港人投下神聖的反對票」，要求佢「盡快公開交代投下棄權票的理據」喎。
「近半市民贊成修議規」
交代咪交代囉，怕你咩？陳沛然噚日就發返聲明，話自己過去幾個月出席咗10幾個醫學學院畢業典禮，每次都有醫生向佢提出批評，認為應該支持政府同議事規則修訂，「字眼和語氣比《杏林覺醒及真普選醫生聯盟的聲明》更尖銳、更嚴厲。我亦留意到中大的民調結果，近半市民贊成立法會修改議事規則」。換言之即係質疑，得你哋惡晒咩？所以喺反對同棄權之間，佢就揀咗棄權啦。
佢又話，自己誠心接受意見和批評，喺辯論嘅過程中，佢都有講過反對有關修訂內容，亦想利用時間換取空間，希望正反雙方可以商討，「可是辯論愈來愈情緒化，愈來愈多人身攻擊、意氣之爭，無助解決事件。」
所以話，政客成日話為咗香港人，唔通真係個個都為香港人咩？香港人主流想通過議事規則修訂，佢哋咪又係拉布，仲想鬧埋唔肯同佢哋一齊反對嘅人，真係幾「民主」呢？ ■香港文匯報記者 鄭治祖