反對派最鍾意操控選舉，吓吓都想「唯我獨尊」去點名投畀指定人物，稍稍唔聽話都唔使旨意分佢哋啲票。今日就係第十三屆港區全國人大代表選舉，反對派早幾日就出咗張投票名單，話要唧走啲比較乞人憎嘅建制人士喎，但望真啲張名單，仲有佢哋自己友、反對派高教界選委王凱峰喺入面喎。點解寧願投建制都唔投王凱峰？咪就係因為佢反「佔領」囉。王凱峰噚日就寸嘴回應，唔通反對派話可以投嘅嗰班人入面，又個個都支持「佔領」咩？
雖然反對派喺人代選舉方面嘅票數唔足以影響大局，但講到選舉都要乘機表個態或者報吓仇。話說佢哋日前就推出咗個36人嘅投票名單，大家更關注嘅係想睇佢唔投邊個，喺芸芸愛國愛港人士之中，竟然有個成日搞事、反對派自己友王凱峰喺度。
唔撐「佔領」 不獲投票
消息一出，反對派中人都四圍放風，有人話係因為王凱峰唔支持「佔領」，所以有啲人覺得點都唔可以投佢喎。教協早兩日亦出咗聲明同王凱峰劃清界線，話從來都冇支持佢去選人代咁話。不過印象中當日佢聲稱港大有學者「造假」、出嚟選選委時都好得反對派歡心㗎喎。
疑似被用完即棄嘅王凱峰，噚日回應傳媒時就話「尊重但唔認同」呢張名單，認為自己唔支持「佔領」，但自己都反對人大「8．31」框架，唔通咁都唔夠？仲質疑返轉頭問，唔通反對派嘅投票名單入面，啲建制派又支持「佔領」咩，深信選民會理性投票咁話。有反對派中人亦都話，如果反「佔領」就唔投得，咁點解當日特首選舉，一班反對派又走去支持反「佔領」嘅曾俊華呢？
反對派鍾意分裂再分裂咁玩杯葛，唔少網民都睇得幾開心。「Patrick Wong」就話︰「『犯（泛）民』呢招玩分化......一直係咁！見怪不怪。不過不投『泛民』王凱峰是正確的。」 ■香港文匯報記者 甘瑜