反對派自導自演嘅所謂「初選」噚日宣佈結果，最終新界東由「新民主同盟」嘅咖喱飯（范國威）「勝出」，九龍西則係之前被DQ嘅姚松炎，意味傳統反對派將由呢兩個人代表出選相應嘅地區補選。話就話「初選」係想團結反對派嘅力量，但事實上好多聲音都係你唔妥我、我唔妥佢，例如有人就想睇「雙失」嘅民主黨，喺袁海文輸畀蟲炎、死敵咖喱飯又勝出下，點樣含淚助選；有人就話咖喱飯贏到，證明尸位素餐嘅傳統反對派冇辦法再把持大局；亦有人喺蟲炎未被DQ，已經率先擔心排第二嘅老馮（馮檢基）萬一真係「Plan B」上位，咁應該點算。到底立法會補選嘅時候反對派仲會唔會鬼打鬼，你話呢？
政治呢家嘢真係好絕情㗎，理得你喺地區服務幾多年，老馮最終得嗰23.52分，遠遠落後於空降西九、但得到各反對派加持、攞到64.22分嘅蟲炎，咁就成為咗「Plan B」，原本諗住打埋立法會選舉最後一仗，咁就變成最後一程。至於民主黨嘅袁海文就得12.25分，真係輸咗九條街。
新東向來都係激進派嘅地盤，今次就各路人馬加持都冇用，工黨郭永健都係得嗰23.51分，慘狀同老馮差唔多，而民主黨死敵咖喱飯就有57.11分，意味民主黨今鋪真係要含淚助選啦。而學聯前常委張秀賢其實同郭永健差唔多，但因為團體票冇乜，所以以19.37分排包尾。
劉細良恥笑傳統反對派「離地」
被稱為「舔范堂堂主」嘅時評人劉細良，佢嘅facebook專頁「城寨」就出文笑傳統反對派，話佢哋脫離民意，「新東力捧郭永健，不惜用負面宣傳攻擊范國威，在總計分中佔10%的組織投票中投給郭，違背新東選民意願，究竟是漠視民意，還是私怨當道。至於姚松炎，本身是DQ受害者，問政能力有目共睹，民主黨民協還要死出嚟爭，結果大敗而回。今次『初選』是民意力量的展示！」
fb發文恭喜 鴿粉斥「鬧劇」
民主黨噚日亦死死地氣喺fb出文，話「恭喜晒姚教授同范先生」，幾咁見外呢，佢哋話會「尊重『初選』機制」，全力支持呢兩個人喎。不過有啲鴿黨支持者就留言表示不滿，「Lam Clarence」就問︰「又俾（畀）佢（姚松炎）選多次？」「Homa Homa Cheung」直接話︰「鬧劇一場。」
有啲人贏咗都想贏到盡，例如蟲炎方面，就有好多支持者不滿老馮可以做「Plan B」，驚蟲炎萬一入唔到閘，到時就要含淚支持老馮。前鴿黨成員羅健熙睇到就嬲，喺fb出文話︰「最後個結果係你贏，但若果因為 Plan B 唔啱心水就蘊（醞）釀想推翻成個機制，係極度不負責任、缺乏政治倫理、沒有道德、輸打贏要、公然走數（下刪大量平時用嚟鬧政府的字）既（嘅）事。強烈呼籲教授（蟲炎）身邊的人唔好再出嚟放風、試水溫，希望教授可以自己親自清清楚楚講一次你係尊重呢個機制。」
不過，「Tin Fong Chak」就喺羅健熙篇文度留言話︰「 教授好似係清清楚楚咁講咗，佢唔會跟呢個機制。」仲引用埋之前蟲炎話「Plan B」未得到反對派所有政黨同意，要再作討論咁話。睇嚟呢場鬼打鬼真係睇到投票嗰日都仲得。■香港文匯報記者 甘瑜