海麗外判清潔工的工潮結束，但係其間嘅籌款風波似乎仲有排搞。話說職工盟用「支援海麗罷工」籌到逾28萬元，但其中得4萬幾元成為「罷工津貼」，仲有23萬元就留咗嚟「支援日後其他工人抗爭」喎。職工盟秘書長李卓人就話，佢哋「一早講明」籌得款項部分會落佢哋「罷工基金」個袋，而做法「得到工友一致同意」喎。不過，有網民就搵返職工盟等反對派組織當日派嘅單張，其中講明籌得款項會「全數」支持海麗邨工友，質疑職工盟玩緊語言偽術，魔鬼原來在細節中，根本同佢哋口中嗰啲無良僱主一模一樣。■香港文匯報記者 羅旦
李卓人被指「又私袋」籌得款項，職工盟幹事杜振豪等就出post，話係激進「本土派」抹黑，仲上載咗職工盟同埋民協區議員楊彧嘅有關嘅單張「以證清白」，話其中清楚講明係為職工盟嘅罷工基金籌款，而且仲講明在支援海麗邨工友嘅同時，「餘款」會撥作支援其他工運。
單張寫全數 海麗工只收$250
不過，唔少人發現楊彧所派嘅單張裡面係用咗「海麗清潔工友罷工基金」嘅名義，職工盟單張亦係話籌得款項「全數」支援海麗邨工友嗰噃，質疑職工盟係玩語言偽術。
「譚梓軒」揶揄：「一直以為『所有捐款全數用於維持工友罷工期間的生活』係指會比（畀）曬（晒）清潔工人們......原來係你捐幾多佢地（哋）都只會收到每日$250......」佢仲標註咗『我閱讀理解0分」、「係我錯我無睇清楚條款細則」等。
網民：捐款者不知情等於呃
「Po Lam」也說：「『全數』支持工友㗎，不過又會有『餘款』。嘻嘻，開始懷疑自己識唔識中文。」「Nico Tang」就道：「都是罷工基金，不要分得那麼細。」「Carol Wong」也道：「其實係咁，『海麗清潔工友 罷工基金』，『友』同『罷』中間，有隔一格架（㗎）！做乜唧！」
「Caesar Lam」就話：「最重要係donors（捐款者）知唔知，又同唔同意。你叫人捐錢但唔話俾（畀）人知啲錢原來有第二個用途，咁同呃錢有咩分別？「Emily Yeung」直指：「個個都諗住快d（啲）捐錢俾（畀）d（啲）工人應急㗎嘛，邊估到惡魔在細節啫！」
「Chan Kwok Kee」就道：「下次唔該係籌款箱上大大個字寫明你損（捐）一佰，實得$20俾（畀）工人。咁就清楚。」「Connie Tse」更回帶：「情況同上次『聲援抗爭者遊行』，口講就所有抗爭者，出post又列齊百幾個抗爭者個名，最後係（喺）捐款箱細細隻字13+3，騙徒手法大致一樣，第日捐款時真係要睇清楚！」
工潮例籌款 何須搞基金
有網民就更加用心，指職工盟嗰個所謂「罷工基金」，條數至今都唔清唔楚。「Adam Wong」指：「根據『勞工權益基金』網頁內文，於碼頭工潮結束後成立，除碼頭罷（工）籌得的餘款$90755.78，加上基金開始時籌得的30萬元，結餘有近40萬。」
佢繼續話：「今次清潔工潮為何不直接動用該筆款項，反而一開始先籌款？如果每次工運都一開始就籌得足夠甚至有餘的善款，又為何要成立基金？另外『賬目交核數師審核』又有冇公開讓公眾人士或捐款人查閱？」
「Kaiho Like』也道：「點解捐款唔係累積？由2013年開始計到現在9-1-2018止的數目？之前d（啲）錢去曬（晒）邊？點解唔直接用？又要再捐！」