■傻根在fb轉發蟲泰個帖，並留言批評。。 陳云根fb截圖大家掛同一個牌頭，一個當選，一個落選，尤其是落選嗰個號稱「上知天文下知道理」，當然梗係百般滋味在心頭啦！「熱狗」主席蟲泰（鄭松泰）近日喺其網台節目抽水5歲女童臨臨之死，話要迫使政府立兒童保護法咁話。「青城派國師」傻根（陳云根）近日就發帖質疑，話「賦予政府更多法律權力，之後成人都被虐待」喎！有「云粉」就話，身為立法會議員剩係識咩都叫政府介入，將家庭責任外判，令人反感咁話。
鄭倡立法「保護兒童」
蟲泰近日喺《熱血時報》嘅節目度，借臨臨一事抽水，話呢單喺屯門發生嘅虐殺兒童案「再次顯露了政府部門的官僚主義」，而特區政府正就成立「兒童事務委員會」展開諮詢，「我們必須趁咨（諮）詢期間，向政府施壓，迫使政府立兒童保護法，令政府正視兒童權益」云云。
傻根就喺fb轉發咗蟲泰呢張帖，仲話「香港已經有保護兒童的法律，但被濫用的多，被適用的少。賦予政府更多法律權力，之後成人都被虐待。家庭的問題歸家庭，將家庭的責任給予政府、學校，社會的基礎就解體了」。
陳批家事卸責予政府
唔少「云粉」撲出嚟附和。「Li Pan」聲言：「 現政府的權力早已過大，家長已失去大部分教育子女的權力，若繼續把權交給政府，香港人最終連保護子女的權力也失去。」「Cliff Hou」也道：「家庭兒童問題係一個很複雜的問題，當中有唔同原因，唔係立法就可以輕易完全解決問題，更要注意當中反而會衍生更多問題。」
有人更將矛頭指向蟲泰。「Jane Checketts」道：「香港D（啲）議員，一有事，就只求立法又立法。全部是換湯不換藥的自欺之舉。」「Tony Ng」就話：「從來好反感動不動就立法管呢樣嗰樣，尤其呢啲立法會議員，正正就係手上得把螺絲批，就將所有問題當螺絲處理。」「Gary Tse」揶揄：「令我諗起有d（啲）環保×想通過強權去實現環保。」
蟲泰就留言「反駁」：「我想，關鍵是：兒童問題是不是等同家庭問題。兒童權益法其中一個重點亦強調初級預防與家庭支持的重要性，與現行的『防護兒童條例』取向明顯不同。」
「Chui Chin Pang Justin」留言反擊：「現在立法等同身為父母的本份（分），外判給政府代為管教，去剝削家庭的天職與權利。」
「Mientje Torey」也批評道：「老師諗住教精佢，可惜孺子不可教，見到咁嘅反應，都唔會有任何賢哲去指點佢，就同『泛民』『左膠』講理一樣，太睇得起佢地（哋）智商。」 ■香港文匯報記者 羅旦
