「民主動力」噚日開記招公佈「初選」結果，話前日有約2.6萬人投票，仲將電話調查、實體投票同組織投票3個部分分開計分列晒出嚟，仲列到小數點後2個位，好似好仔細、好公正咁喎。不過，有網民就發現，「民主動力」公佈嘅數字，計落去有出入，於是留言問「民主動力」點解會咁，但「民主動力」當然冇回應啦。
要短時間內砌好條數好難㗎，「民主動力」噚日就公佈咗各個「候選人」得分係點計出嚟，喺尤其複雜的電話調查部分，佢哋就話個計算方法係「以非建制支持者為基礎，再集中分析『初選』候選人在第一和第二選擇的得票，前者乘以三分，後者乘以一分綜合計算，結果以『票值』顯示」。
睇呢段文字到一嚿嚿都唔緊要，總之佢哋就設定咗條特別嘅公式，咁我哋睇數字啦。喺電話調查入面，新東嘅張秀賢嘅「票值」係305、范國威係923、郭永健係287，加埋241棄權或無效嘅票值，咁總數就係1,757啦；九西方面，馮檢基係633、姚松炎係366、棄權或無效係179，加埋總數就係2,115。
網民質疑「造數」
網民「Jackie Lee」就留言質疑數字有問題，話九西嘅總數應該係2,116、新東係1,756，佢仲同大家計返比率話︰「如果305佔20.14%，總數應該係1,514，923佔60.89%總數應該係1,516，287佔18.89%總數應該係1,519，點解3個百分比會出唔同總數？」不過「民主動力」就冇回覆呢位網民嘅留言囉，但唔緊要啦，反正好多網民直情覺得成個「初選」都係「造數」咋嘛。
另一方面，噚日有唔少人都慶祝姚松炎打低搵大巴車市民去投票嘅馮檢基，講到「邪不能勝正」咁，但有短片就顯示，有姚松炎嘅支持者就喺馮檢基嘅大巴上面向老婆婆派姚松炎嘅傳單，連阿婆都問佢「咁做冇犯規咩」，但對方隨口就話冇。姚松炎事後都有回覆傳媒查詢，話自己冇批准過人咁做喎，但就話嗰個行為唔涉及有向市民提供利益，所以唔覺得有犯規囉。■香港文匯報記者 甘瑜