香港文匯報訊（記者 羅旦）有份參加立法會補選反對派「初選」嘅前學聯常委張秀賢，前排報稱自己1月8日在大圍俾兩名男子襲擊。網媒「傳真社」昨日發佈閉路電視片段，顯示張秀賢當日被兩名男子尾隨並走入橫巷，但就沒有攝得張秀賢「被打」的情況。有網民質疑，張秀賢明知被人尾隨，竟然捨大路而走入一條狹窄、俾人熔咗都無人知嘅橫巷，令人諗起民主黨成員林子健報稱被「內地執法人員」在鬧市「擄走」的事件，有人就指張秀賢或者真係俾人打，但佢大路唔走走小路，即係討打，呢啲咁蠢嘅人如果當選立法會議員，香港市民就真係該煨囉！
閉路電視見回頭望冇呼救
「傳真社」取得張秀賢報稱被襲擊地點、來自大圍村一幢三層高建築物的兩部閉路電視的片段。第一個閉路電視的片段顯示，當晚約11時12分，張秀賢拿着一把紅白綠顏色的便利店雨傘走入小巷，神色慌張及前顧後盼，急步走向鏡頭後方的大圍村內。現場環境陰暗，有街燈照亮小巷路口。
約10秒後，有兩名身形高大，皮膚黝黑的男子初時慢慢步入小巷，其後突然加速跑上前。張秀賢向「傳真社」確認，片中兩名男子是襲擊他的人。被問及他何以捨大路而走小路，他則稱：「我當時選擇入小巷，因為小巷通往大圍村，當時心裡想法是兩名男子入村後不會再追到，但之後覺得不對勁，於是選擇U字形路線即時走出大街，最後在大街被兩名男子襲擊，當時亦有市民目擊到。」
不過，村民似乎唔多接受。有網民就話據常理判斷，一個人在街上遇到危險，基本上都係往人多的地方尋求協助或大聲呼救，「點解會跑去暗巷俾人砌？」
有人亦話張秀賢當時的行為有違常理，並據此質疑現在正是反對派搞「初選」的關鍵時刻：「是導演失誤或是編劇無腦？」
網民譏似師奶劇讚好戲
網民「Hou Yin Lee」就直言：「睇無線（綫）嗰啲師奶劇通常都係咁（大路唔行行小路）出事。」「Sam Law」就點評張秀賢當時已經頻頻回頭，即係已經知道俾人跟蹤啦，點解仲要走橫巷：「啲c（師）奶劇又係一樣會不停望返轉頭，驚人跟唔到咁。」
「Lawrence Wong」也揶揄道：「（張秀賢）仲可以咁淡定，另（擰）轉頭望多幾眼佢地（哋）追到未，啲戲好屎！」「Matheson Law」就恥笑：「（張秀賢）跟住望返前面，原來已經企咗係（喺）度......good take，全世界放飯！」
網民質疑釘書健翻版
Helen Lee：睇鏡頭（張秀賢）巳（已）經係發覺到俾人跟，仲行入後巷？求打呀？
Mark Lau：大路唔行行小路？一個唔小心俾距（佢）選到就真係搞笑。
Asuna Mansi：有危險正常人比（俾）人追打都會去人多既（嘅）大街同埋商店求救，自己一條友衝入後巷，匪夷所思。
李內：10點半鐘，街上大把人，常理判斷，你在街上遇到危險，基本上係往人多的地方尋求協助或大聲呼救，點解會跑去暗巷俾人砌？該案存在一個有違常理的地方，又剛好是參選的時候，是導演失誤或是編劇無腦？
Lawrence Wong：仲可以咁淡定，另（擰）轉頭望多幾眼佢地（哋）追到未，啲戲好屎！
Rodney Sin：「初選」就到，又黎（嚟）學人整單陳水扁中槍事件博同情攞知名度？林子健自己都打咗21口釘喺個大髀度喇！
XMiso Cheng：明顯與釘書健的劇本有所不同，今次斥重本用真人而棄用隱形人，在劇本上有一大突破，但選擇走入後巷的做法，明顯同正常人逃命的自然反應好大出入，編劇在此環節上明顯想製造靈異片的感覺。
資料來源：fb留言 香港文匯報記者 羅旦