腦袋是個好東西，希望人人有一個。是咁的，要參加新界東補選嘅「新民主同盟」嘅范國威，近日喺fb出咗張宣傳海報，借用咗由網絡小說改編嘅電影《那夜凌晨，我坐上了旺角開往大埔的紅VAN》嘅海報，改咗做「那夜凌晨，我接觸坐上旺角開往大埔的紅VAN乘客」（見圖），宣傳自己會去通宵小巴站拉票，仲將海報上演員個頭key晒佢班豬隊友嘅頭，仲自誇話係「神改圖」喎。
技術層面嘅嘢就唔多講嘞，key個頭上去key到兩截色都叫「神」，咁成個網絡都係「神改」。不過，呢張宣傳海報最大鑊嘅係，有睇過呢套戲嘅人應該記得，套戲裡面嘅小巴乘客，喺套戲裡面一路行，一路死吓一個，死吓又一個，仲要無緣無故同坦克車開片，到最後成班人就係唔知俾人車咗去邊。嘩，搵套咁嘅戲以為好貼地，事實就好似詛咒班咁啱撞正范國威班紅VAN乘客好危險？
事實上，有網民就留言，提醒佢哋用套戲咁宣傳好唔老嚟噃，「搭小巴啲人死晒喎！」「Morris Leung」就話：「根據套電影，張相裡面大部份（分）人都會死。......仲要係慘死。」「謝平」就話：「那麼，乘客都給嚇怕了，請你不要來大埔吧！」「Fai Ho」厚道啲，剩係話：「創意十足，政治敏感度有限。」
「新同盟」解決問題嘅方法，就同其他反對派一樣，唔係刪咗張海報，而係「解決」提出問題嘅人──刪咗呢啲人留言咪得囉！嘩，范國威真係有民主精神嘞！■香港文匯報記者 羅旦
