林 作
每年嘅11同埋12月，是香港各所大學行畢業典禮嘅時間。早前同我個大學死黨傾開，發現原來佢女朋友巖巖喺港大畢業，無喺香港行過畢業禮嘅我當然會好奇吓到底同我哋牛津行畢業禮有咩分別。
其實，當年我哋嘅畢業禮比較簡單。首先，行禮之前或者之後喺自己嘅學院跟教授以及同屆畢業生食個Formal Meal，同教授討論下近況前程以及世界大事，又可以跟舊同學聯誼下感情。畢業禮則喺Sheldonian Theartre（謝爾登劇院）舉行，古典得嚟不失簡潔，好快就完成整個典禮。出嚟之後同約好嘅朋友喺出面影相敘舊，始終朋友唔會太多好快影完，搞掂後除咗件畢業袍準備夜晚去「劈」，喪玩一餐。
我死黨嗰日就忙好多。香港呢邊一直有個習慣，畢業嘅同學總會有一隻畢業公仔或者一束花拎住嚟影相，所以我個Friend一早就要去預訂好畢業公仔。而在當天接近個半鐘嘅畢業典禮過後，佢首先同（幫）女友同埋佢嘅長輩影相，然後就去同女友嘅朋友去齊港大各個唔同嘅景點影相。因為女友港大朋友眾多，最終嗰日由下午一直影到接近7點先走人，我死黨基本上得番半條人命。離開嘅時候仲見到好多畢業生興致勃勃咁繼續影相，認真犀利。
相對之下，雖然英國嗰邊朋友會比較少無咁熱鬧，但係我仍然比較鍾意嗰邊簡單嘅慶祝Style，而我死黨亦都深表認同，慳錢又慳時間。不過，當我問到嗰日過得開唔開心嘅時候，佢笑容燦爛咁畀咗個笑而不語嘅樣我。唓﹗講咗大半日幾辛苦幾慘咁原來心底暗暗Enjoy緊﹗哈，古龍先生果然誠不欺我，男人，大半都是天生嘅賤骨頭。不過，子非魚焉知魚之樂，箇中快樂實在不足為我呢種外人所道也。