■司徒子朗在fb出post，鬧爆反對派初選廢到笑兼無恥，直指大台「借DQ擴大勢力」。 fb截圖反對派嘅所謂「初選」機制崩壞，但「自決派」似乎覺得迫走Plan B民協老馮（馮檢基）仲係唔夠。「民主動力」前幾日開會後話所有持份者一致同意一旦「自決派」立法會九龍西參選人姚松炎被DQ，就會由Plan C袁（袁海文）頂上，而民主黨中委會前日亦通過有關決議。不過，「自決派」又開始想迫走埋佢。有人就話，就算真係Plan C袁頂上，「政治倫理」上佢都應該公開承諾用返蟲炎（姚松炎）嘅政綱，同養埋蟲炎；有人就摷返Plan C袁之前同領展高層摸杯底嘅新聞出嚟，擺明想做低佢；有人仲出錢另搵替補𠻹，話冇人去自己會去馬喎。 ■香港文匯報記者 甘瑜
反對派之前傾「初選」機制，個個都將重點擺喺大家可唔可以團結支持勝出者，睇返真係好傻好天真，其實會唔會團結支持有機會替補嘅Plan B、Plan C，先至係今次重點。
馮家強鬧蟲粉「講倫理」搵傀儡
老馮早前被迫走後，Plan C袁就忽然要再諗清楚，前日有鴿黨中委會撐腰後，先正式話去馬，但都係成為被針對目標。
立法會議員葉建源個助理林兆彬就話，自己接受唔到一個支持領展又反「全民退保」嘅Plan C做替補，前日仲喺facebook度出文，問如果「不幸」要由替補頂上，「政治倫理上佢係咪應該公開承諾會用返Plan A嘅政綱？甚至承諾會拎d（啲）議會資源畀Plan A呢？」
呢句都算客氣，有林兆彬「拋磚引玉」後，姚松炎支持者麥家凱就更進一步發帖話︰「姚松炎如果被DQ，係咪應該選姚松炎議辦的成員做後補成為影武者，而政綱是請姚松炎做議辦的成員。」
一直鬧反對派喺「初選」機制上冇口齒嘅教協總幹事馮家強就留言挑機︰「咁萬一唔覺意犯選舉法，係咪Plan A去坐？」之後再補多個留言︰「咁做Plan B、Plan C都幾慘，要做Plan A傀儡。俾（畀）我就唔做了。」
「Jess Cheng」就順住「政治倫理」個邏輯話︰「如果以你（林兆彬）呢個講法，政治倫理上應該係無論政綱、議會資源、職員甚至義工......應該係以游（游蕙禎）或『青政』為先喎！」
不過，「自決派」要欽點參選人，你班人嗌破喉嚨都係冇用㗎啦。「中箭（香港眾志）」主席羅三七（羅冠聰）前助理司徒子朗亦喺fb出文，話個「民主動力」嘅策劃者個腦都係裝屎，「初選」機制冇鬼用，認為由Plan A欽點Plan B先係最合理。
三七前助理話要出選挑機
佢仲力踩Plan C袁做「領展文」，揶揄佢同領展關係密切之餘，仲直言如果畀「初選」只得10分嘅Plan C袁頂上，係懲罰選民，再啜核形容︰「『雞糊槓上槓』，除咗大家on（戇）×同意咗之外，睇唔到呢個制度有任何合理性。」
佢噚日再出多篇文，話要資助5萬蚊選舉按金，搵個「支持《全民養老金2064》、支持『自決』路線，反對領展嘅人」參加九龍西補選咁話，仲呼籲選民唔好放棄自己嘅「政策立場及原有路線」，又話如果冇其他人參選，佢會去馬喎。
中大學生會前會長王澄烽都轉載咗司徒子朗篇文，表明自己會全力支持。
網民「勸」袁改名姚松炎參選
其他網民就繼續向袁海文施壓。「Gongsun Qiao」揶揄︰「連馮檢基都能做得（到）向公眾宣佈退出，睇嚟袁海文連馮檢基都不如。」「Sam Wong」更陰謀論道︰「又係賣港民主黨，又要含×投票，唔×怪得放軟手腳任得政虎（府）DQ姚松炎，投你老母啦，咁做乜踢走逢檢雞（馮檢基）先，原來為左（咗）自己友上......」「Peter Chan」就曲直難分咁話︰「建議袁海文改名做姚松炎出選。」
呢鋪真係︰袁海文你走啦，我唔想搞大件事呀！