■三七兜完一個又一個，都幾忙噃。fb截圖蟲炎（姚松炎）為咗選票，大言話要月捐8萬喎！不過，支持佢參選嘅「香港眾志」主席羅三七（羅冠聰）突然出口術，話以「會否捐人工」作為判斷「是否支持候選人」的關鍵因素「大有問題」，「對於真正為香港做事的議員，這些議員薪津，是值得的。」相信呢段說話其實係為咗「同一陣線」、正俾人鬧緊口講「協助抗爭者」，但冇話會捐人工嘅區諾軒、范國威開脫。
涉賄仲當賣點 未選到話應得
羅三七喺fb發帖，話蟲炎「有意」捐助被DQ政團，「我認為這是很能幫助到被DQ政團的舉動，但亦奉勸市民朋友真的不要將『捐人工』列為揀選議員的條件之一。」
佢首先就幫蟲炎被質疑此是「賄選」辯護，話「姚生現在已沒有『民主派』競爭對手，沒有任何誘因利用『捐人工』作為突圍的吸引點」。喂，阿哥！呢次補選得「民主派」參選咩？蟲炎贏梗嘅咩？咩叫「冇誘因」？
羅三七其後就稱，以「會否捐人工」作為判斷「是否支持候選人」的關鍵因素卻是「大有問題」。「一來『有汗出有糧出』，......（捐人工）亦不應該拿來當作一般要求候選人要達到的門檻。......要知道姚教授本身就是屬於資源比較多的候選人，也坦白講只有少數人有他的條件去做這樣的承諾。對於真正為香港做事的議員，這些議員薪津，是值得的。」
「不應該拿來當作一般要求候選人要達到的門檻」？3個反對派參選人中，區諾軒同范國威都冇話捐錢噃，其中尤以范國威俾人插得最金。
「天水圍民生關注平台」社區幹事王百羽就喺羅三七個帖度留言：「咖哩（喱）飯無做兩年立法會議員都仲可以生存到唔使乞食，咁即係份人工對佢嚟講都唔係咩問題啦，......姚教授都講得出，咁選民對其他地區候選人有期望都係正常姐（啫）！」
因催「獨」而被DQ嘅沙田區議員陳國強就發帖叫范國威「學嘢」：「范生協助『抗爭義士』不捐錢？同你講心嗎？」
由中大講師劉正主理嘅fb專頁「無神論者的巴別塔」就發帖，鬧晒范國威同區諾軒，話「飯民垃圾會議員可以做的大概就只剩下將月薪捐出，確實壯大抗爭力量：可是另外兩位補選候選人，區諾軒與范國威，仍對九萬多月薪念念不忘，『人工最高、抗爭反是其次』，足反映其政棍本質」喎。港島區候選人還包括陳家珮、伍廸希、任亮憲。 ■香港文匯報記者 陳川