■陳皓桓（左）拍咗條片，恐嚇啲細路仔。 網上圖片細路仔嘅心靈需要小心照顧，一不留神俾啲「怪叔叔」、「怪哥哥」嚇一嚇就唔抵啦！好似社民連成員陳皓桓咁，為咗恐嚇市民，阻撓國歌法本地立法，最近拍咗條話係國歌法「街頭諮詢」嘅片，實際就不斷提出啲極端情況嚇啲細路仔，好似當佢問到一個細路如果阿媽「唔識唱國歌就會坐監」會點，個細路驚到話無理由要佢做孤兒，好彩佢阿媽就喺隔離啫，返到屋企真係要好好PG家長指引！
扮「諮詢」誤導 「唔識唱犯法」
反對派為反對國歌法本地立法，可謂無所不用其極，經常用上情況極端、不符事實嘅偏頗「例子」嚟達到恐嚇市民嘅目的。洋名「Figo Chan」嘅陳皓桓，就喺條片入面專揀啲唔夠秤嘅細路仔學生妹做「諮詢」。
個「諮詢」結果都幾一面倒，都係對國歌法本地立法抱懷疑態度，可能啲支持意見俾人大刀一剪飛咗去資源回收桶啦，但更有可能係成個「諮詢」充滿誤導！
例如當佢請啲細路唱兩句國歌嚟聽吓，喂大佬叫細路上鏡拍片已經唔容易啦，仲要佢哋唱歌，仲唔怕醜死咩？當啲細路靦靦腆腆唱咗兩句就停嘅時候，佢就話人「唔識唱」、「無跟音調」、「無跟節奏」，就已經「犯法」喎。
不過，根據特區政府嘅本地立法建議文件，一個人如果公開及故意篡改國歌歌詞、曲譜，以歪曲、貶損方式奏唱國歌，或以其他方式侮辱國歌，咁先算犯法，陳皓桓咁講仲唔係靠嚇？
陳皓桓仲問到佢哋「專登立法規管教國歌」同埋「設立國歌課程」合唔合理。睇返建議文件，第十一條就寫「中、小學須教育學生唱國歌、了解國歌的歷史和精神，以及遵守國歌奏唱禮儀」，都無話到有課程，而政制及內地事務局局長聶德權亦都講過，特區政府唔會干預學校制定嘅國歌教程內容。 ■香港文匯報記者 陳庭佳