■Mr.Wally在fb出文澄清和任何政黨均沒有關係，並宣佈拒絕去菜街。正所謂「你不找政棍，政棍也會找上門」。由日本嚟香港表演嘅街頭藝人Mr.Wally，噚日就爭啲俾公民黨借咗嚟過橋，俾公民黨邀請去旺角行人專用區（菜街）唱歌，其實係借啲依咁藉Mr.Wally嘅名氣去支持自己要保留菜街嘅「表演空間」。Mr.Wally見自己個名咁樣俾人「借用」，前日即刻喺facebook出文澄清「我和政治或任何政黨並沒有關係的，請大家不要誤會」、「沒有打算參與任何政治活動」，仲宣佈埋唔去菜街添。一班反對派支持者就留言鬧佢只係識賺錢唔關心香港政治，即刻俾其他網民留言反擊︰「唔show（理）你『泛民』就係政治冷感，係『港豬』......你『泛民』參與既（嘅）就係政治，ok？」
正當唔少旺角居民覺得樓下行人專用區嘅「表演」好滋擾，支持取消嘅時候，公民黨就嚟一個驚人舉動，喺噚日搞個「模擬規管」，希望保留「表演空間」咁話。早兩日佢哋仲開埋記招，大大聲話Mr.Wally都係撐場嘉賓，搞到Mr.Wally割席都割唔切。
指演出被人「轉移焦點」
Mr.Wally前晚深夜就喺fb出文澄清，強調自己「不是因為支持任何政黨而去唱歌，而是只要旺角還有可以唱歌的地方，我才去參加這個活動的。」佢話，由於件事俾人「轉移焦點」，所以噚日就唔會去旺角嘞，臨尾再重要的事情說三次咁話︰「我和政治或任何政黨並沒有關係的，請大家不要誤會。我沒有打算參與任何政治活動的。我只是想為了帶給香港人快樂而唱歌。真的就只是這樣。我沒有任何政治立場，也沒有興趣參與政治。既然出了這樣的報導（道），我明（昨）天就不參加演出了。」
結果，佢噚日就去咗屯門表演，仲叫咗大家得閒去睇𠻹。
雖然唔少網民留言支持Mr.Wally唔好俾政棍利用。fb專頁「旺角人旺角事」話︰「真正既（嘅）街頭表演者，唔受你班公民袋（公民黨）操縱呀，哈哈哈哈哈哈哈！」
輔仁媒體總編容樂其話︰「好彩無痴（黐）埋去公民黨度咋！」「無敵神駒」仇思達亦留言︰「 強烈支持Mr. Wally作出英明決定，免受公民黨政棍愚弄擺布（佈）！向你致敬！」
反對派喪鬧不關心港政治
但咁樣落公民黨嘅面，班反對派支持者當然唔會放過你啦。社民連成員、曾經參與「反新界東北撥款」示威被判刑嘅朱偉聰就留言話︰「唔一定要支持政黨架（㗎），但唔好講到件事同政治無關囉！」再二連擊留言︰「區議會就係政治，菜街去留都係政治。你可以唔支持任何政黨，但老套d（啲）講句，你不找政治，政治也會找上你，菜街殺街就是好例子。」
網民揶揄「政棍找上門」
網民「Andy KC Ng」就反駁朱偉聰話︰「樓主根本唔係要人關心政治咁簡單，想夾×人支持你個××行動姐（啫）！」佢又直言︰「菜街殺街根本係德政，你個×頭係咪唔×出mk（旺角）架（㗎），我行街果（嗰）陣大媽係（喺）度『群魔亂舞』幾咁滋擾你知唔×知ar（啊），何況係樓上住d（啲）人？」「Dada Fung」就揶揄︰「你唔搵政棍，政棍都會找上門，例如公民黨、社民連。」
「Charis Hung」繼續質Mr. Wally︰「不嬲講生活就係政治，唔理政治嘅人會俾人話係『港豬』。咁多人鍾意你支持你，香港人因為政治生活喺水深火熱之中你知唔知？仲話想帶快樂俾（畀）香港人？不過可能你都唔係香港人，你只係黎（嚟）唱歌搵錢，都唔係太介意。」咁樣用「道德高地」去夾人，「Vina Tsang」睇唔過眼話︰「日本歌手唔係一定要關心香港政治掛？你×晒外國d（啲）明星呀不如。」「Elson Chow」亦問︰「逼旅港外國人關心香港政治係咩玩法？」 ■香港文匯報記者 甘瑜