■巫堃泰都睇唔過眼。 fb截圖反對派做嘢，永遠講啲唔講啲，試圖誤導市民，「自決派」立法會議員朱凱廸就最精於此道。近日，佢嘅元朗團隊就發帖話，政府為喺元朗明渠興建540米行人天橋而要斬樹，搞到好似所有樹都無一倖免咁。
「社運人士」巫堃泰就發帖，話自己都唔同意起橋，但批評朱凱廸團隊發放fakenews，話政府只會移除其中37棵樹，但同時會在原地1:1補償樹木，仲話咁樣贏取民意好唔道德。
立法會財務委員會即將審議在元朗明渠興建540米行人天橋的17億元撥款申請，朱凱廸元朗團隊就喺fb專頁用「17億元朗長城『斬樹錄』」為題發帖，話有關工程將會斬去「多棵陪伴元朗人成長的大樹，綠色走廊毀於一旦」。
齋睇標題同第一段，仲以為呢個工程會斬晒所有樹𠻹。不過，「魔鬼」在細節，佢哋喺其後亦話項目只係計劃斬樹近40棵，以興建6個「升降座」，每個都有扶手電梯、升降機、樓梯和輪椅斜道，並呼籲居民聯署要求擱置撥款！
同道批手法低樁
同樣為激進派嘅巫堃泰就發帖，話自己雖然都反對元朗擴闊天橋方案，「但是我覺得勉強找個理由甚至有fakenews成份（分）的說法嘗試贏取民意，對進步陣營來說是很不道德的。」
佢踢爆道：「明明環評報告說了，工程範圍近百棵樹，只有37棵健康為Fair到Poor的樹需要移除。而且，工程將會在原地1:1補償樹木，亦即是就算有天橋，渠邊社區沒有樹木淨損失。只說斬樹不說補償，就只是向公眾說了部份（分）事實而已。我知道這個工程很可惡，但是我們可以打得乾淨一點，可以嗎？」
「為了反天橋，可去到幾盡」
「香港測量師監察」fb專頁就轉發了有關帖子，並發文道：「又唔算係fake，不過明顯講D（啲）唔講D（啲），唔夠誠實lor（囉）！」帖子仲標註咗「為了反對起天橋」、「可以去到幾盡」、「只能說」、「講D（啲）唔講D（啲）」、「唔算講大話」。
「香港規劃情報」亦發帖道：「政治嘅現實，原來有d（啲）保育人士係冇咩誠信。」「法國佬行旺角」專頁就話：「朱凱廸元朗團隊以假新聞做議題，拉動仇恨，又真係手法卑劣。」「2018九西敗選關注大聯盟」則揶揄：「選舉近了， fakenews也多了，好似係。」
「Edmond Chui」就留言稱：「從來唔覺得斬樹可以補償，斬左（咗）大樹種返棵樹仔，補償唔返幾十年光陰。」巫堃泰就話：「有些（要移除的樹）生在渠壁上，有些根大到已經谷起路面支撐不了。就算沒有天橋，要處理它們都只是時日問題。」
「Vincent Wai Kit Man」就話：「樹其實係一株株咁買返嚟，我朋友在大埔，錦田經營植樹場，供應樹木俾（畀）政府，發展商，廸士尼等公共機構作綠化之用。如果有人要樹，我可以幫手問吓價。」
「Kai Lung Ho」亦留言指：「其實條橋凌空，理論上可以一樹不斬的，不如撥錢鞏固加固棵樹更好。原則上，我同意你，似乎朱凱迪（廸）佢地（哋）係危言聳聽。」「Jeromy Yu Chan」就揶揄：「怪唔得要咁多幫佢搞Fakenews地方報啦！」■香港文匯報記者 陳川