■區諾軒連日俾人鬧爆，前晚終於喺fb發帖道歉。 區諾軒fb截圖「自決派」立法會議員區諾軒，近日因多次在立法會討論他口中的重要議題時缺席冇投票，言行不一而被鬧爆。一直龜縮嘅妦蚸颿e晚喺fb發帖，話自己係因為在會議前一個月「答應了相當重要的事」而無法出席投票，但咩事呢，佢就語焉不詳地話「我有我要保護的人」而「恕難多講」喎。咦，之前有人話佢去日本，到底做咩咁神秘呢？唔通佢又去咗見曾經參加佢造勢大會嘅日本右翼反華分子甚至更高層人物？有人更猜測，佢見嘅可能係已棄保潛逃咗嘅旺暴案被告、「本土民主前線」發言人黃台仰，所以先咁神秘喎！
立法會工務小組委員會上個月通過咗政府申請17億元，喺元朗起天橋嘅建議。當日有5個反對派議員缺席，令項目得以通過。缺席者嘅區諾軒，就俾中文大學講師劉正嘅fb專頁「無神論者的巴別塔」踢爆佢去咗日本，仲搵人幫佢日日更新網頁「扮」身在香港。
fb解畫 保護「神秘人」
由於連日俾人鬧爆，區諾軒前晚終於喺fb發帖道歉，但講到點解缺席時就語焉不詳，話「係因會議事前，我答應了相當重要的事，而且是一月前已決定，實在無法做到終止事情於星期六的工務小組投票」，但係咩重要事呢？「我有我要保護的人，恕難多講事情如何。」
鬼鬼祟崇去日本，仲死都唔肯講做咩，梗係有鬼怪啦！如果大家唔善忘，會記得今年3月港島區補選期間，一直同被DQ嘅「香港眾志」嘅周庭好friend嘅日本右翼反華分子和田健一郎（「獨郎」），特登抽兩日嚟港為區諾軒打氣，仲話自己一早就識區諾軒，稱對方當選後，大家「合作」促進香港同日本嘅「交流」，而自己回日本後會喺當地講解更多有關香港嘅「政治情況」，引起更多日本人「關注」。
唔通今次就係「交流」？抑或見嘅係更高層嘅反華人物？有網民就更有「創意」：「John Lo」質疑佢口中想保護嘅人，「可能係通緝犯（黃台仰）呢！要保護嘛！......佢（區諾軒）咁寫法攞嚟死，一睇就知見一個唔見得光嘅人，除非老作！」
網民鬧爆 促交代詳情
「David Chan Chi-Man」就質疑：「作為一個民選議員，缺席開會缺席投票，選民係有權知道原因，為何你不用向選民交代？」「Elven Tang」批評：「你咁忙就唔好做議員啦，就算係因為極端情況，例如白事/見最後一面，我都不太原諒以此理由缺席重要的投票。」
「Zoe Yung」也道：「你出嚟做plan B參選時，係唔係應該要問吓羅冠聰做議員嘅時候，犧牲幾大，你做唔到佢做嘅嘢，就唔好出嚟選啦！」
佢仲爆料：「當日『人力』同你和『眾志』見面時，慢必（『人力』議員陳志全）都提咗你喺議會內，『泛民』開會記錄唔好，你話只係有小小課堂工作要處理之外，會勤力開會。唔係乜嘢白事的話，根本毫無藉口唔嚟開會。」
唔止一次 缺席累街坊
「CL Man」就數區諾軒「唔單止一次無克盡己職，仲有以下兩次都係因為『泛民』（包括你）缺席令議案由嬴（贏）變輸。你只做左（咗）三個月議員已經有咁嘅劣績」，仲批評佢「真獨裁」：「點解選民監察議員，（網民）純粹議（以）事論事，無粗口無謾罵會被無故刪留言及禁留言？」 ■香港文匯報記者 陳川