■蔣麗芸發帖尋找陳淑莊。 蔣麗芸fb圖片公民黨立法會議員四眼陳（陳淑莊）之前死都唔畀人斬香港大學鄧志昂樓門前嘅兩棵細葉榕，企喺條路上大大聲聲扮要保護樹木，到上周三港大有其他危樹倒塌，佢就深潛到無影。民建聯立法會議員Ann姐（蔣麗芸）見到四眼陳唔出聲想當冇事，前日就喺facebook帖文「尋人」，驚四眼陳「潛水太深，恐生意外」喎。唔少網民都留言恥笑四眼陳抽水抽出禍。
網民寸反對派齋抽水
Ann姐個帖文附咗張尋人嘅相，中間印住四眼陳個樣，內文就話「自上月陳現身港大石牆瀕塌大樹現場後，本月6日港大有危樹倒塌，同月8日再有大樹倒塌，陳氏卻一直未有現身，余甚掛念。連日大雨，余憂其潛水太深，恐生意外，任何人士如發現其行蹤，請即告知，萬分感謝。」寸爆四眼陳抽水不成就潛水。
唔少網民都加入鬧爆四眼陳班政棍只識抽水，唔顧市民利益。「Ming Yam Sit」話：「有啲黃屍之前寸我！話嗰啲樹係冇問題！如果要斬，全世界好多樹要斬，但我問佢係咪呢方面專家，（佢）即時粒（笠）水，好似失蹤個（嗰）幾（個）議員一樣！」「Franky Wan」批評：「見怪不怪，反對派一貫作風，有抽水出鏡機會，一定最前線，出事就潛水。」「Chun Kau Chiu」揶揄︰「改名陳『縮』莊啦！」 ■香港文匯報記者 鄭治祖